Мыекъопэ спорт еджапIэу Джэнчэтэ СултIан ыцIэ зыхьырэм гандболымкIэ иотделение зыщызыгъэсэрэ пшъашъэхэм тагъэгушIуагъ. Къыблэ ыкIи Темыр Кавказ федеральнэ шъолъырхэм япервенствэу Астрахань щыкIуагъэм Адыгеим икомандэ хэлэжьагъ ыкIи ащ изэфэхьысыжьхэмкIэ анахь лъэшхэм ясатырэ хэфагъ.
Зыныбжь илъэс 17-м нэмысыгъэ пшъашъэхэм заушэтыгъ, Урысыем ипервенствэ икIэух едзыгъо хэлэжьэнхэмкIэ фитыныгъэ къыдахыным фэбэнагъэх. Адыгеим икомандэ 24:23-у Астрахань хэкум зэрэтекIуагъэм ишIуагъэкIэ ащ фэдэ амал иIэ хъугъэ.Турнирым изэфэхьысыжьхэр:Адыгеир – Ростов хэкур – 28:34, Адыгеир – Волгоград хэкур – 24:27, Адыгеир – Астрахань хэкур – 24:23, Адыгеир – Краснодар краир – 18:36.Урысыем ипервенствэ икIэух едзыгъо 2027-рэ илъэсым гъэтхапэм и 13-м къыщегъэжьагъэу и 23-м нэс къалэу Тольятти щыкIощт, ащ командэ 12 хэлэжьэщт.