ЛэжьакIохэм яфедэхэр къэухъумэгъэнхэр

Граждан обществэм изэкъогъэуцонкIэ профсоюзхэр амалышIоу щытых. Ахэм япшъэ­рылъхэр сыдигъуи зэхъокIыхэрэп — цIыфхэм яшIоигъоныгъэхэр къыраIотыкIых, къагъэгъу­нэх ыкIи афэгумэкIых, социальнэ гъусэныгъэм дырагъаштэ, лэжьакIохэм янеущырэ мафэ яцыхьэ телъынымкIэ ищыкIэгъэ амалхэр зэрахьэх. МэфэкIым ипэгъокIэу псауныгъэм икъэухъумэн иIофышIэхэм я Адыгэ республикэ профсоюз организацие итхьаматэу Любовь Усачевам «Адыгэ макъэр» IукIагъ. Мыр профсоюз анахь инхэм ащыщ.

— Пэублэм къыхэзгъэщымэ сшIоигъу аужырэ илъэс къинхэм ямылъытыгъэу, псауныгъэм икъэухъумэн иIофышIэхэм япрофсоюзхэм ясатырэ изыкIыныгъэ къызэтедгъэнэн зэрэтлъэкIыгъэр ыкIи ныбжьыкIэхэр нахь къыхэтщэнхэм тынаIэ зэрэтетыгъэр. Мы уахътэм ехъулIэу нэбгырэ минищ фэдиз ащ хэхьэ. Респуб­ликэм имедицинэ IофышIэхэм япроцент 77-м ехъур профсоюзым хэтых, арышъ, ахэм яфитыныгъэхэр ыкIи яфедэхэр къыгъэгъу­нэнхэ амал организацием иI. Илъэсищым къыкIоцI медицинэм щылэ­жьэрэ купхэм зэзэгъыныгъэ 30 адэт­шIыгъ, проценти 100-м нэсэу къызэлъытыубытыгъ, — хигъэунэфыкIыгъ Любовь Усачевам.Ежь Любовь Алексей ыпхъум ыцIэ профсоюзхэм ятарихъ пытэу хэуцуагъ, илъэс 50-м ехъугъ мы лъэныкъом фэгъэ­загъэу ащ Iоф зишIэрэр. Джыри Адыгэ хэку санитарнэ эпидемиологие станцием Iоф щишIэзэ, ащ ипрофсоюз итхьаматэу хадзыгъагъ. Нэужым псауныгъэр къэухъу­мэгъэным иIофышIэхэм якъэлэ совет ипрофсоюз ипащэу агъэнэфагъ, 1994-рэ илъэсым къыщегъэжьагъэу джы зыIут IэнатIэр егъэцакIэ. Я 90-рэ илъэс анахь къиным апэрэ псэупIэ кооперативэу ащ зэхищэн ылъэ­кIыгъэм ишIуагъэкIэ медицинэ IофышIэхэм апае Черемушкэм щагъэпсыгъэ унэм фэтэри 100 къафыхагъэкIыгъагъ. Чанэу ипшъэрылъхэр зэ­ригъэцэкIагъэхэм ишыхьат Любовь Усачевам щытхъуцIэхэу «УФ-м псауныгъэр къэухъумэгъэнымкIэ иотличник», «АР-м псауныгъэр къэухъу­мэгъэнымкIэ изаслуженнэ IофышI» зыфиIохэрэр къызэрэфагъэшъошагъэхэр.Профсоюзхэм къафэдгъэзэжьымэ, ахэр щыIэныгъэм щыхъурэ-щышIэрэм сыдигъо­кIи лъэплъэх, Iоф зышIэрэ цIыфыр зэри­хьылIэрэ гумэкIыгъохэр алъэгъу, ахэм язэшIохынкIэ амал зэфэшъхьафхэр агъэ­федэх.— Анахьэу тынаIэ зытет лъэныкъуищыр зэхъокIырэп. Бюджетым епхыгъэ IофшIапIэхэр ары тыздэлэжьэнэу хъурэр, сыда пIомэ экономикэм инэмыкI секторхэм профсоюзхэр ащыгъэпсыгъэныр къин хъугъэ. СыдигъокIи лэжьэпкIэ анахь макIэу IофышIэм къыратырэр зыфэдизым профсоюзхэр езэгъыхэрэп, ар нахьыбэ зэрашIыщтым кIэдэух. ЯтIонэрэ лъэныкъоу тызпылъыр социальнэ гъусэныгъэр ары. ТиIофшIэнкIэ гъэхъагъэ тшIын тлъэ­кIыщтэп хабзэм икъулыкъухэм зэпхыныгъэ адытимыIэу. ЛъэхъаныкIэм диштэу социальнэ гъусэныгъэр стратегическэ лъэныкъоу тиIофшIэн къыхэхьагъ. Хэбзэ къулыкъушIэхэм, профсоюзхэм ыкIи Iоф­шIэн языгъэгъотыхэрэм зэдэгущыIэгъу агъэпсынымкIэ, яшIоигъоныгъэхэр зэдаштэнхэмкIэ ар мэхьанэ зиIэ площадкэ афэхъугъ. Адыгеим ипрофсоюз­хэмрэ хэбзэ къулыкъухэмрэ азыфагу бэшIагъэ зэдэлэжьэныгъэ пытэ зилъыр. А лъэныкъор тиреспублики дэгъоу щыпхыращыным Адыгеим и ЛIышъхьэу КъумпIыл Мурат ынаIэ тет. Ящэнэрэ лъэныкъор — IофшIэныр щынэгъончъэным тынаIэ тетыныр, — къы­Iуагъ Любовь Усачевам.Медицинэ IофышIэхэм ясоциальнэ- экономикэ фитыныгъэхэм япхыгъэ Iофыгъохэм зыщатегущыIэхэрэ комиссие пстэуми Л. Усачевар ахэт. Арышъ, Iофыгъоу къэуцухэрэм дэгъоу ащыгъуаз.Пшъэрылъэу агъэцакIэхэрэм нахь игъэкIотыгъэу ягугъу къэтшIымэ, ахэм ащыщ IофшIэныр щынэгъончъэным епхыгъэ уплъэкIунхэр. Джырэ шапхъэхэм адиштэрэ амалышIухэр щыIэхэ хъугъэ нахь мышIэми, непи IофшIапIэхэм тхьамыкIагъохэр къащэхъух. Профсоюзым иреском уплъэкIун 21-м укъоныгъэ 1155-рэ къыхигъэщыгъ, пэщэ 28-мэ ахэр дагъэзыжьынымкIэ унашъохэр афигъэ­хьыгъ.ЛэжьапкIэм итынкIэ профсоюзхэм я Федерацие илIыкIо ягъусэу уплъэкIун 17 рагъэкIокIыгъ, укъоныгъэ 51-рэ къыхагъэ­щыгъ, ахэм ащыщэу нахьыбэр дэгъэзыжьыгъэ хъугъэ. Медицинэ IофышIэ нэбгырищымэ фэгъэкIотэн пенсиер афамыгъэнэфагъэу хьыкумым зыфагъэзагъ.— Медицинэ IофышIэхэм анахьыбэрэ зыкъызэрэтфагъазэрэр лэжьапкIэм еп­хыгъ. ТынаIэ зытедгъэтырэр медицинэ IофышIэ пстэуми яокладрэ нэмыкI ахъщэ тедзэхэмрэ ябаланс къызэтедгъэнэныр ары. Окладым къызыхагъахъокIэ, зэхэт хахъоу IофышIэм иIэм къыщымыкIэным тыкIэдэугъ. 2026-рэ илъэсым имэзих зэфэтхьысыжьымэ, медицинэ IофышIэхэм яоклад къыхэхъуагъ: врачхэм — процент 51,5-м, гурыт IофышIэхэм — процент 55,9-м ыкIи ахэм къакIэлъыкIохэрэм — процент 70,9-м нэсыгъ, — къыхигъэ­щыгъ профсоюзым ипащэ.Любовь Алексей ыпхъум къызэриIуагъэмкIэ, лэжьапкIэм итынкIэ зэшIомыхыгъэ Iофыгъуабэ джыри щыI. Ар зыфэгъэ­хьыгъэр «прочий персонал» зыфаIохэрэр ары. Республикэм имедицинэ учрждениехэм аIут нэбгырэ пчъагъэм ипроцент 40-р мы купым хэхьэ ыкIи ахэм яIофшIэн хэмытэу зы лъэныкъуи зэхэщагъэ хъущтэп. Зигугъу къэтшIырэ IофышIэхэм ялэжьапкIэ мэкIэ дэд ыкIи ащ итынкIэ къежьэгъэ системакIэми мыхэр къыщыдыхалъытагъэхэп. Мыщ фэгъэхьыгъэу игъо тлъэгъухэрэр федеральнэ гупчэм агъэхьыгъэх.Медицинэм илъэныкъо гъэнэфагъэхэм IофышIэхэр ащэкIэх, ау нахьыбэр рагъэ­къун алъэкIыгъ. Псауныгъэм икъэухъумэн иIофышIэхэм япрофсоюз ынаIэ зытыригъэтыхэрэм ащыщ ясатырэ хэтхэм языгъэпсэфыгъо уахътэ дэгъоу афызэха­щэным, япсауныгъэ санаториехэм ащагъэпытэным, ящыкIэгъэ IэпыIэгъур арагъэгъотыным. Аужырэ илъэсищыр тштэмэ, профсоюзым хэт IофышIэ ыкIи яунагъохэм ащыщ нэбгырэ 1500-м ехъу зыгъэпсэфыпIэхэм агъэкIуагъэх. ЩыIэныгъэм чIыпIэ зэжъу ригъэуцогъэ нэбгы­рэ 1825-мэ ахъщэ IэпыIэгъу арагъэгъотыгъ, ащ щыщэу унэгъо 37-р хэушъхьафыкIыгъэ дзэ операцием хэлажьэхэрэм ащыщ, сомэ миллиони 5-м ехъу ащ пэIухьагъ.ТигущыIэгъу къыхигъэщыгъэхэм ащыщ япрофсоюз зэхэщэн, культурнэ ыкIи спорт Iофтхьабзэхэр, зэнэкъокъухэр зэрэзэхищэхэрэр. Ахэр IэпэIэсэныгъэм, кIэлэцIыкIухэм, унэгъо шэн-хабзэхэм афэгъэ­хьыгъэх.— КIэлэцIыкIу сурэтшIыгъэхэм язэнэ­къокъоу «Сянэ-сятэхэр — медикых», «Си Адыгей», «Урысыер — си Хэгъэгу», нэмыкIхэри редгъэкIокIыгъэх. Ахэм нэбгырэ 200 фэдиз ахэлэжьагъ. Медицинэм иIофышIэу тызэрэщытым елъытыгъэу, псауныгъэр гъэпытэгъэным фэIорышIэрэ амалхэр зэлъядгъэшIэнхэм ыуж тит, ащ епхыгъэу спартакиадэхэр, зекIо слетыр, нэмыкIхэри зэхэтщагъэх. НыбжьыкIэ форумэу «Молодежь, за профсоюз держись!» зыфиIорэр мэфищырэ редгъэ­кIокIыгъ, ахэм ахэлэжьагъэхэр дгъэшIуа­гъэх, — хигъэунэфыкIыгъ Любовь Усачевам.КIэух зэфэхьысыжь тшIымэ, псауныгъэр къэухъумэгъэным ылъэныкъокIэ Iоф зышIэхэрэм ящыIэкIэ-псэукIэ зыкъегъэ­IэтыгъэнымкIэ социальнэ гъусэныгъэм исистемэ зыпкъ иуцон ылъэкIыгъ. Непэрэ мафэм ехъулIэу Адыгэ Республикэм ипрофсоюзхэм я Федерацие исатырэ нэбгырэ мин 30 фэдиз, пэублэ организацие 500-м ехъу хэхьэ.

IЭШЪЫНЭ Сусан.