ЯщыIэныгъэ щысэтехыпI

Урысые зэнэкъокъоу «Илъэсым иунагъу-2026» зыфиIорэм зэфэхьысыжьхэр Москва щыфашIыгъэх. ЗэхэщакIохэм къызэрэхагъэщыгъэмкIэ, шэн-хабзэхэр къэухъумэгъэнхэм ыкIи къыткIэхъухьэрэ ныбжьыкIэхэм IэпыIэгъу афэхъугъэным афытегъэпсыхьэгъэ форумыр я 11-у мыгъэ рагъэкIокIыгъ.

Хэгъэгум щыпсэурэ унэгъо мин 50-м ехъу ащ хэлэжьэгъах. Урысыем ишъо­лъырхэм къарыкIыгъэ зэшъхьэгъусэ 89-рэ бэмышIэу Кремлым щагъэшIуа­гъэх. Шъачэ хэхьэрэ къуаджэу Тхьагъапшъэ щыпсэурэ адыгэ унагъор ащ щытекIуагъэхэм зэу ащыщ. «Унагъор — шэн-хабзэхэм яухъумакIу» зыфиIорэ лъэныкъо­хэмкIэ ар ДипломкIэ къыхагъэщыгъ. Хэшх унагъор лIэшIэгъуныкъом къехъугъэу шъолъырым ичIыпIэрысмэ яшэн-хабзэхэм, якультурэ якъэухъумэн ыкIи язегъэушъомбгъун адэлажьэ.Лъэпкъ культурэхэм я Гупчэу ПсышIуа­пэ дэтым адыгэ культурэмкIэ и Гупчэ лъэпкъ нэшанэр тыдэкIи щыолъэгъу: зэнэкъо­къухэм ыкIи фестивальхэм къа­щыдахыгъэ диплом ыкIи кубок пшIы пчъагъэхэр, щытхъу ыкIи рэзэныгъэ тхылъхэр мэкIайхэм атетых ыкIи ате­лъых, апэмычыжьэу адыгэ быракъыр, адыгэ пщынэр, пхъэкIычхэр, шыкIэпщынэр ащыолъэгъух, дэпкъмэ — «Налмэсым», абхъаз къэшъокIо ансамблэу «Кавказым» яконцерт афишэхэр ыкIи сурэт зэфэ­шъхьафхэр ягъэпкIыгъэх. Анахь чIыпIэ хэхыгъэм Хэшх лIакъом илIыкIо пIа­шъэу, къуаджэу Тхьагъапшъэ инахьыжъэу Щухьаибэ Лэмсэф ыкъом исурэт пы­лъагъ. Ар Шапсыгъэ щызэлъа­шIэрэ пщынаоу зы лъэхъанэ щытыгъ. Сталинград къыухъумэзэ Хэгъэгу зэош­хом хэкIодагъ. Мары икIалэу Аслъан Адыгеим ыкIи Пшызэ шъолъыр культурэмкIэ язаслуженнэ IофышI, лъэпкъ къэшъокIо ансамблэу «Шапсыгъэм», адыгэ орэдым илъэпкъ инструментальнэ ансамблэу «Насыпым» язэхэщакIу. Джащ фэдэу Краснодар краимкIэ апэрэу кIэлэцIыкIу еджапIэу адыгэ лъэпкъ нэшанэхэр къыз­щыдалъытэрэр къуаджэу Хьаджыкъо ащ щигъэ­псыгъ.ЯлIакъокIэ зыпылъхэ Iофыр — культурэм щылэжьэгъэныр — лъигъэкIотагъ Хэшх Аслъан икIалэу Руслъан.Руслъанрэ ащ ишъхьэгъусэу Русетэрэ зызэ­дэпсэухэрэр илъэс 36-рэ хъугъэ. Руслъан Абхъазым изаслуженнэ артист, культурэмкIэ Адыгеим изаслуженнэ IофышI, пщынау, Лъэпкъ культурэ­хэм я Гупчэу ПсышIуапэ дэтым адыгэ культурэмкIэ и Гупчэ ипащэу Iоф ышIагъ, блэкIыгъэ илъэсым къыщыублагъэу кIэлэцIыкIу къэшъокIо ансамблэу «Шапсыгъэ инэфылъэхэр» зыфиIоу къуа­джэу Агуй-Шапсыгъэ щызэхащагъэм иIэшъхьэтет.Русетэ поселкэу Шэхапэ къыщыхъугъ, лIакъомкIэ Ацумыжъхэм ащыщ, илъэс 20-м ехъурэ ПсышIопэ къэлэ сымэджэщым медсестрау щылэжьагъ, джырэ уахътэм — клубнэ IофшIэнымкIэ специалист.Непэ унагъом итворческэ гъогу япшъа­шъэмэ лъагъэкIуатэ — Тэрчокъу Бибэ къэшъокIо ансамблэу «Шапсыгъэм» ихудожественнэ пащ, Гъырбэ Сурет Лъэпкъ культурэхэм я Гупчэ адыгэ культурэмкIэ и Гупчэ иIэшъхьэтет.

Зигугъу къэтшIырэмэ яшъхьэгъусэхэри творческэ унагъом щыщ хъугъэх, ящыIэныгъэ искусствэм ахэми рапхыгъ: Гъырбэ Саид инструментальнэ ансамблэу «Насыпым» ихудожественнэ пащ, Тэрчокъу Мурат ансамблэу «Шапсыгъэм» ибалетмейстер.— Мы унагъомкIэ орэдыр, къа­шъохэр, лъэпкъ шэн-хабзэхэр сэнэхьатым щыщ къодыехэп, ар ящыIэныгъ, ялIэужхэр зэзыпхырэ яIоф шъыпк, — къыщыкIа­гъэтхъыгъ лъэпкъ культурэхэм я Гупчэ. — Мыщ нахьыжъхэм якIэн щагъэлъапIэ, кIэлэцIыкIумэ лъэпкъ культурэр шIу арагъэ­лъэгъу, ежьхэм ящысэкIэ къагъэ­лъагъо лIакъом ылъапсэ пытэн, ащ итарихъ ущыгъозэн зэрэфаер. Илъэсхэр макIох, унагъом хэхъо, ащ дакIоу адыгэ культурэм зэрэфэлажьэхэрэм фэгъэхьыгъэ тарихъми зеушъом­бгъу. ЛIэуж пэпчъ еж иунэе Iахь лIэкъо Iофым хелъхьэ, ащ тетэу уахътэр, лIэужхэр зэпхыгъэхэ мэхъу.Хэшххэм яунагъо зэнэкъокъум зэрэщатекIуагъэр илъэс пчъагъэхэм Iофэу ашIагъэм, ялъэпкъ зэрэфэшъыпкъагъэ­хэм, лъэпкъ культурнэ кIэным иухъумэн зэрэдэлэжьагъэхэм къакIэкIуагъэу къыщыхагъэщыгъ Краснодар краим иадминистрацие.— Пшызэ унэгъо пытэхэмкIэ ищытхъу аIо. Нахьыжъхэм шъхьэкIэфэныгъэ афэтэшIы, гупсэмэ тынаIэ атетэгъэты. Ащ фэдэ шэн шIагъохэу тицIыфхэм ахэлъхэмрэ къэралыгъо политикэу тиIэмрэ зэдештэх, лъэпкъ проектэу «Унагъу» зыфиIорэм ипшъэрылъхэм атефэх. Шъачэ щыщ унагъом федеральнэ едзыгъом текIоныгъэ къызэрэщыдихыгъэмкIэ тыфэгушIо, — къыхигъэщыгъ IофшIэнымкIэ ыкIи социальнэ хэхъоны­гъэмкIэ Краснодар краим иминистрэу Сергей Гаркуша.Хэшх унагъом джащ фэдэу Шъачэ ипащэу Андрей Прошуниныр къыфэгушIуагъ.— Осэшхо иIэу сэлъытэ Урысые Федерацием и Президентэу Владимир Путиным лъэпкъ зыкIыныгъэм и Илъэсэу 2026-р зыщигъэнэфагъэм тефэу лъэныкъоу «Унагъор — шэн-хабзэхэм яухъумакIу» зыфиIорэмкIэ Шъачэ щыщхэр анахь дэгъухэу къызэрэхагъэщыгъэхэр, – къыкIигъэтхъыгъ курортым имэр.Ныбэ Анзор.