ДзюдомкIэ Урысыем ичемпионатэу Ставрополь краим икъалэу Минеральные Воды щыкIуагъэм Адыгэ Республикэм илIыкIохэм медалитIу къыщахьыгъ.
Тигъэзет къызэрэхиутыгъагъэу, килограмм 60-м нэс къэзыщэчыхэрэм якуп хэтыгъэ Мерэм Дамир текIоныгъэр къыдихыгъ. ЯтIонэрэ медалыр тишъолъыр къыфэзыхьыгъэр Бэгъ Аслъан. Ащ килограмми 100-м нэс къэзыщэчыхэрэм якуп зыщиушэтыгъ ыкIи кIэух едзыгъом нэсыгъ. Тиспортсмен Темыр Осетием щыщ Вячеслав Косоевым, Къэбэртэе-Бэлъкъар Республикэм илIыкIоу Быф Идар, Москва къэзыгъэлъэгъогъэ Далер Михалевым атекIуагъ, финалныкъор Мухаммед Муталиевым къышIуихьыгъ. Ау финалым тибэнакIом нахь лъэшыгъ Ставрополь краим испортсменэу Роман Резниковыр.ГъэхъэгъэшIу зышIыгъэ Бэгъ Аслъан къыфэгушIуагъ Адыгэ Республикэм и ЛIышъхьэу КъумпIыл Мурат. Ащ итренерхэу Беданэкъо Рэмэзанрэ Мудрэнэ Аслъанрэ ирэзэныгъэ гущыIэхэр апигъохыгъэх.Мерэм Дамиррэ Бэгъ Аслъанрэ ухьазырыныгъэ дэгъу зэряIэр, дзюдом, нэмыкI бэнэн лъэпкъхэм хэхъоныгъэ ашIыным, мыхэм апыщагъэхэм япчъагъэ нахьыбэ хъуным республикэм мэхьанэшхо зэрэщыратырэр къэралыгъом ичемпионат изэфэхьысыжьхэм къагъэлъэгъуагъ. ТапэкIи ягъэхъагъэхэм ахагъэхъонэу, джыри нахь лъэгэпIэ инхэм анэсынхэу тиспортсменхэм ыкIи ахэр зыгъасэхэрэм афэтэIо.