Iэшъынэ А.
Мобилизацием изэхэщэнкIэ Iофтхьабзэхэр нахь дэгъоу резыгъэкIокIыгъэхэм афэгъэхьыгъэу къалэу Мыекъуапэ Iоф щызышIэрэ организациехэм азыфагу щыкIогъэ зэнэкъокъум зэфэхьысыжьхэр фашIыгъэх. Ащ хэлэжьагъэх Мыекъуапэ идзэ комиссарэу Алексей Санташовыр, къэлэ администрацием хэушъхьафыкIыгъэ программэхэмкIэ и ГъэIорышIапIэ ипащэу Александр Равкович.
Iофтхьабзэм къырагъэблэгъагъэх организациехэм ыкIи предприятиехэм япащэхэр, джащ фэдэу мобилизацием епхыгъэу Iоф зышIэхэрэр.Мобилизацием илъэхъан организациехэм япащэхэм анахьэу анаIэ зытырагъэтын фэе лъэныкъохэм А. Санташовыр къащыуцугъ. Ахэр: мобилизационнэ ухьазырыныгъэ яIэнымкIэ Iофтхьабзэхэр зэхэщэгъэнхэр ыкIи регъэкIокIыгъэнхэр, ащкIэ планхэр зэхэгъэуцогъэнхэр, дзэ- учетнэ подразделениехэр гъэпсыгъэнхэр, дзэ учетымкIэ пшъэрылъхэр гъэцэкIэгъэнхэр, нэмыкIхэри.Мыекъопэ дзэ комиссариатым ипащэ къызэрэхигъэщыгъэмкIэ, зэзэгъыныгъэ шIыкIэм тетэу къулыкъу зыхьыщтхэм яугъоинкIэ къафагъэуцугъэ пшъэрылъым изэшIохын джыри лъагъэкIуатэ. Мы илъэсым нэбгырэ 350-рэ фэдизмэ къулыкъу ахьынэу агъэнафэ, мы уахътэм ехъулIэу ар процент 70-м ехъоу агъэцэкIагъ. Ахэм IэпэчIэгъэнэ полкхэу лъэсыдзэхэм, шхончэо частьхэм къулыкъур ащахьы.
Джащ фэдэу организациехэм ыкIи предприятиехэм япащэхэм, Мыекъуапэ дзэ учетым ылъэныкъокIэ пшъэдэкIыжь зыхьыхэрэм гъэгъозэн Iофтхьабзэхэр щытхъу хэлъэу зэрэрагъэкIокIыгъэхэм фэшI зэрафэразэр дзэ комиссарым къыIуагъ. Iофтхьабзэм къызэрэщаIуагъэмкIэ, УФ-м зыкъэухъумэжьынымкIэ и Министерствэ зэзэгъыныгъэ дэзышIы зышIоигъохэм ахъщэ тынэу аратырэм хагъэхъуагъ.Iофтхьабзэм икIэух мобилизациемкIэ зэхэщэкIо анахь дэгъухэм ацIэхэр къараIуагъэх, шIухьафтынхэр аратыгъэх. Мыекъопэ къэлэ администрацием апэрэ чIыпIэр фагъэшъошагъ, ятIонэрэр хьыкум приставхэм я Федеральнэ къулыкъу и ГъэIорышIапIэу Адыгэ Республикэм щыIэм къыдихыгъ. Адыгэ республикэ клиническэ сымэджэщым ящэнэрэ чIыпIэр ыубытыгъ.НэмыкI едзыгъохэмкIи зэнэкъокъур рекIокIыгъ ыкIи къахэщыгъэхэр агъэшIуагъэх.КIАРЭ Фатим.