М. Гордышов
Адыгеим и ЛIышъхьэу КъумпIыл Мурат Мыекъуапэ икъэлэ парк ибассейн шъхьэихыгъэ игъэкIэжьын зэрэкIорэр зэригъэлъэгъугъ. Сберым игъусэхэу къагъэхьазырыгъэ проектым диштэу бассейнымрэ ащ къыпэIулъ чIыпIэмрэ зэрэщытэу агъэкIэжьыщтых.
Урысыем и Правительствэ IэпыIэгъу къафэхъузэ, 2025-рэ илъэсым инфраструктурэ бюджет чIыфэмкIэ IофшIэнхэм япэублэ чэзыу зэшIуахыгъ: псэолъэжъхэр зэпкъырахыжьыгъэх, пкъэухэр агъэуцугъэх, чапэхэр агъэпытагъэх, бассейным къыпэIулъ чIыпIэм къашъхьэпэщт псэуалъэхэр щагъэпсыгъэх. ЯтIонэрэ чэзыум игъэцэкIэнкIэ мыгъи Сберыр IэпыIэгъу къафэхъу. Проектым диштэу псыIыгъыпIэрэ каскад псыутхрэ агъэпсыщтых. Псыутхым къэлэ паркыр къызэригъэдэхэщтым имызакъоу, лъэсрыкIохэр зыщытезекIухьащтхэ чIыпIэхэм язы Iахьэуи хъущт.
КъумпIыл Мурат псэолъэшIыпIэм щыIагъ, гъэкIэжьын Iофхэр зэрэкIорэр ыуплъэкIугъ, Мыекъуапэ имэрэу Геннадий Митрофановым, подряднэ организацием ипащэу Жэнэ Адам IофшIэнхэр зэрэзэхащэщтхэм, амалэу зэрахьащтхэм афэгъэхьыгъэу адэгущыIагъ.
Джыдэдэм псэолъэшIхэм чIычIэгъыпсхэр Iузыщыщтхэ системэмрэ псыр зэраукъэбзыщт псэуалъэмрэ ашIых. Метрэ 58-рэ зилъэгэгъэщт псыутхым ылъапсэ игъэхьазырын ыуж итых, буроинъекционнэ пкъэу 420-м ехъу ащ ычIэгъ щагъэпсыгъ. Илъэсыр имыкIызэ ятIонэрэ укъэбзэлъэ станцие ашIынэу, бассейным телъыщт лъэсрыкIо лъэмыджым ыпкъ зэпкъырагъэуцонэу рахъухьэ. Ащ пае мыбюджет къэкIуапIэхэм сомэ миллион 335-рэ къахагъэкIыгъ.
«Къэлэдэсхэр мы псэуалъэм къежэх. Бассейным Iоф ышIэнымкIэ ищыкIэгъэ амалхэр зехьэгъэнхэ зэрэфаем нэмыкIэу, ащ итеплъэ дэхэным, цIыфхэмкIэ Iэрыфэгъуным анаIэ тырагъэтын фае. Рекреационнэ чIыпIэм итеплъэ зыфэдэщтыр джыдэдэм алъэгъун, чIыпIэм изэтегъэпсыхьанкIэ IофшIэнхэмрэ гъэкIэжьын IофшIэнхэр зыщаухыщт чэзыумрэ зэтегъэфэгъэнхэ фае. Псэуалъэр зыщатыщтым ехъулIэу къэлэдэсхэм гухахъо зыщагъотын, унагъохэм зызщагъэпсэфын алъэкIыщт чIыпIэ дахэ афэгъэпсыгъэщт», — къыIуагъ КъумпIыл Мурат.ГъэкIэжьын IофшIэнхэм къакIэкIонэу тызщыгугъырэр къэлэ паркыр бассейным, псыIушъом, Мэздахэм языпхыщт рекреационнэ чIыпIэ дахэ гъэпсыгъэныр ары.