Тыхэм язекIуакIэ щысэтехыпI

Чъэпыогъум иящэнэрэ тхьаумафэ тым и Мафэу хагъэунэфыкIы. Ащ къыдыхэлъытагъэу хэушъхьафыкIыгъэ дзэ операцием иветеранхэм Мыекъопэ къэралыгъо технологическэ университетым истудентхэм зэIукIэгъу адыряIагъ. Iофтхьабзэм кIэщакIо фэхъугъ апшъэрэ еджапIэр иIэпыIэгъоу Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ.

ЗэIукIэгъум ипшъэрылъыгъэр – ветеранхэм, хэкIодагъэхэм, тыхэм лIыгъэу зэрахьагъэм ишIэжь къызэтегъэнэгъэныр, къэзэрэугъоищт лIыхъужъхэм якъэ­бархэр къаIотэнхэр ыкIи ежь ящысэхэмкIэ обществэм ыгу къаIэтыныр.Iофтхьабзэм къырагъэблэгъагъэх хэушъхьафыкIыгъэ дзэ операцием иветеранхэу Эдуард Бараевыр, Николай Носуровыр, Руслан Арапиевыр. УIэгъэ хьылъэхэр атещагъэ зэхъу нэужым мыхэр мамыр щыIакIэм зэрэхэгъозэжьыгъэхэр, къиныгъоу зэпачыгъэхэр, яунагъохэр ыкIи фондыр IэпыIэгъу къызэрафэхъугъэхэр, адаптивнэ спортым зыкъызэрэхагъотагъэр студентхэм къафаIотагъ.Шъолъыр фондым ипащэ игуадзэу Джарымэ Еленэ зэIукIэгъур къызэIуихызэ, тилIыхъужъхэм ягукIуачIэ ыкIи шIулъэгъоу Хэгъэгум фыряIэр лIэужхэм зэIэпахызэ къызэрэрыкIохэрэр, кIэлэцIыкIухэр ятэхэм зэрарыгушхохэрэр къыхигъэщыгъ.— Тыр – унагъом ыкIи Хэгъэгум яухъумэкIо закъоп, ар гъэсакIоу щыт, ищысэкIэ пшъэдэкIыжь пхэлъыным, пытагъэм, укъэзыуцухьэхэрэм лъытэныгъэ афэпшIыным фегъасэх. Непэ къедгъэблэгъэгъэ ветеранхэр джащ фэдэх, унагъохэр яIэх, тых, сэкъатныгъэ зэряIэм емылъытыгъэу, спортым гъэхъэгъэшIу­хэр щашIыгъ, — къыIуагъ Джарымэ Еленэ.Краснодар шъолъырхэм язэнэкъокъоу «Хэгъэгум иухъумакIохэм я Кубок» зыфиIоу щыкIуагъэм Адыгеир урыгушхонэу нэбгырищым къыщагъэлъэгъуагъ. Хьафизэхэм азыфагу теннис цIыкIумкIэ Николай Носуровым текIоныгъэр къыдихыгъ ыкIи щэрыонымкIэ ятIонэрэ хъугъэ. Эдуард Бараевым щэбзэ щэрыонымкIэ дышъэр къыхьыгъ, Руслан Арапиевыр апэрэу зэнэкъокъум хэлэжьагъ ыкIи щэрыонымкIэ ящэнэрэ чIыпIэр ыубытыгъ.ДзэкIолIхэр хэушъхьафыкIыгъэ дзэ операцием кIонхэу зэрэхъугъэр, Хэгъэ­гур шIу плъэгъуным, ар къэухъумэгъэным, тым игущыIэ унагъом мэхьанэу щыриIэр студентхэм къафаIотагъ. ЯцIыкIугъом щысэтехыпIэу яIагъэр, зигущыIэ рыгъозагъэхэм ягугъу къашIыгъ. КъызэрэчIэкIыгъэмкIэ, нэбгырищми ятэхэр пасэу аухыгъ, ау зым — ятэжъ, адрэхэм – ашынахьыжъхэр лъэгъо тэрэз зэрэтыращэщтхэм ыуж итыгъэх. Джы ежьхэр ясабыйхэм ты дэгъу зэрафэхъущтхэм дэмышъхьахыхэу ыуж итых, язекIуакIэхэр щысэтехыпIэ афэхъуным щыгугъыхэу щыIэныгъэм гъэхъагъэхэр щашIых.Ветеранхэм лIыгъэу зэрахьагъэр, къиныгъохэр зэпачынхэмкIэ зыкъызэрамытыгъэр ныбжьыкIэхэмкIэ щысэтехыпIэу щыт. Мыщ фэдэ зэIукIэгъухэм лIэужхэр зэрапхых, Хэгъэгур къэухъу­мэгъэн закъор арэп кIочIэ шъыпкъэр къызщынафэрэр, упсауным, хэхъоныгъэ пшIыным ыкIи укъэзыуцухьэхэрэм кIэгъэкъон уафэхъуным язы Iахь.IЭШЪЫНЭ Сусан.