Лъэпшъыкъо Ф.
Урысыем икинематографистхэм я Союз иотделениеу АР-м щыIэр кIэщакIо зыфэхъугъэ я VI-рэ кинофестивалэу «Саусэрыкъо дышъ» зыфиIорэр Мыекъуапэ чъэпыогъум и 14-м щыублагъэу и 16-м нэс щыкIуагъ.
АР-м и ЛIышъхьэу КъумпIыл Мурат, Шъэумэн Хьазрэт ишIушIэ фонд ыкIи республикэ грантыр иIэпыIэгъухэу Урысыем икинематографистхэм я Союз ишъолъыр къутамэу Адыгеим щыIэм ар ригъэкIокIыгъ.АР-м ыкIи КъБР-м культурэмкIэ язаслуженнэ IофышIэу, режиссерэу, УФ-м икинематографистхэм я Союз иотделениеу Адыгеим щыIэм ипащэу Нэгъэплъэ Аскэрбый зикIэщэкIо кинофестивалым дунэе мэхьанэ иIэ хъугъэ. «Адыгеир, шIу усэлъэгъу!» зыцIэ кинофестивалыр гъогогъуи 5-рэ зэхащагъ, мы илъэсым ыцIэ «Саусэрыкъо дышъ» зыфиIорэмкIэ зэблахъугъ. Къэралыгъо 22-мэ яIофшIэгъэ 1081-рэ зэнэкъокъум къырахьылIагъ, кинофестивалым хэлэжьэнэу 73-рэ къахахыгъ. Зэнэкъокъум хэлажьэхэрэм лъэныкъуищкIэ заушэтыгъ: анимационнэ, документальнэ ыкIи джэгукIэ шIыкIэм тет кинор.
Апэрэ мафэм Iофтхьабзэр мэфэкI шIыкIэм тетэу къызэIуахыгъ. АР-м культурэмкIэ иминистрэу Аулъэ Юрэ къекIолIагъэхэм шIуфэс гущыIэхэмкIэ закъыфигъэзагъ.— АР-м и ЛIышъхьэу КъумпIыл Мурат ыцIэкIэ шIуфэс фабэ къышъосэхы. Нарт эпосым игерой шъхьаIэу Саусэрыкъо ыцIэ тэгъэлъапIэ, ащ лъэпкъым машIо къыфихьыгъ. Джащ фэдэу мы кинофестивалым хэлажьэхэрэм гукъэкIыжь фабэу мыр агу къинэнэу тэгугъэ. Iофтхьабзэм игъунапкъэхэм зызэраушъомбгъурэм, къэралыгъуабэмэ яфильмхэр зэрэхэлажьэрэм лъэшэу тегъэгушIо. Адыгэ Республикэм кином хэхъоныгъэ щедгъэшIыным тыдэлажьэ, креативнэ индустрием иеджапIэхэр мэлажьэх. Ахэм къачIэкIыгъэ еджакIохэм гугъэпIэшIухэр ятэпхых, — къыIуагъ Аулъэ Юрэ.— 2021-рэ илъэсым апэрэу зэхэтщэгъэгъэ шъолъыр Iофтхьабзэм мы илъэсым дунэе мэхьанэ иIэ хъугъэ. АР-м и ЛIышъхьэу КъумпIыл Мурат ащ иIахьышIу хэлъ. Адыгеим кином хэхъоныгъэ щедгъэшIыным, зедгъэушъомбгъуным, ныбжьыкIэхэр киноиндустрием хэтщэнхэм мыр фэлажьэ, режиссерхэм яIофшIагъэхэр къагъэлъэгъонымкIэ амалышIоу щыт, — къыIуагъ Нэгъэплъэ Аскэрбый.Адыгеим итворческэ коллективхэм концерт къатыгъ. УФ-м лъэпкъ творчествэмкIэ изаслуженнэ фольклор-этнографическэ купэу «Ащэмэзым» къыIогъэ «Саусэрыкъо иорэд» мы Iофтхьабзэм гимн фэхъугъ.КъТРК-у «Адыгеим» ипащэу Ацумыжъ Адам идокументальнэ фильмэу «Хранители культуры» зыфиIорэмкIэ кинофестивалыр къызэIуахыгъ.Мэфищым къыкIоцI зэнэкъокъум хэлэжьэрэ ыкIи ащ хэмыхьэгъэ фильм хэшыпыкIыгъэхэр Мыекъуапэ икинотеатрэхэм къащагъэлъэгъуагъэх.Чъэпыогъум и 16-м фестивалым зэфэхьысыжь фашIыгъ, текIоныгъэ, хэушъхьафыкIыгъэ чIыпIэхэр къыдэзыхыгъэхэр хагъэунэфыкIыгъэх.Кинофестивалым и Гран-при Монголием щылэжьэрэ киностудием ирежиссерэу Батделгер Бямбасурен иIофшIагъэу «Неоткрытое письмо» зыцIэм фагъэшъошагъ. «Анахь документальнэ кино дэгъум» текIоныгъэ къыщыдихыгъ КъТРК-у «Адыгеим» ипащэу Ацумыжъ Адам идокументальнэ фильмэу «Хранители культуры» зыцIэм. ДжэгукIэ нэшанэ зиIэ фильм анахь дэгъоу алъытагъ Мыекъуапэ щыщ режиссерэу Ирина Константиновам ифильмэу «Куда пропал Женька?» зыфиIорэр. Документальнэ киномкIэ — псэупIэу Севастопольскаям щыщ режиссерэу Алина Мигалинам «Улыбка на долгие года» зышъхьэр. ХэушъхьафыкIыгъэ номинациеу «Анахь адыгэ фильм дэгъур» фагъэшъошагъ Налщык щыщ Пэфыф Заринэ ифильмэу «Последний из рода» зыфиIорэм. Анимационнэ киномкIэ IофшIэгъэ анахь дэгъур Москва щыщ Алексей Игнатовым ифильмэу «В Рождество все немного волхвы» ары. «Лучшее нейросетевое кино» зыфиIорэ лъэныкъомкIэ режиссерэу Татьяна Мамонтовам ифильмэу «Орнамент жизни» къыхагъэщыгъ.Лъэныкъо зэфэшъхьафхэмкIэ анахь IэпэIасэхэр къыхагъэщыгъэх. УФ-м икинематографистхэм я Союз икъутамэу АР-м щыIэм ыцIэкIэ зэнэкъокъум хэлэжьагъэхэм зэкIэми дипломхэр ыкIи ахъщэ шIухьафтынхэр афагъэшъошагъэх.— Лъэпкъ кинематографием хэхъоныгъэ ышIыным республикэмкIэ мэхьанэшхо иI. Титворчествэ уасэ къызэрэфашIыгъэр гуапэ тщыхъугъ. Кинопоэзие шъуашэм илъэу лъэпкъ культурэ шIэныгъэм ыкIи искусствэм язэнэсыпIэхэр зыщызэхэгъэщэгъэ фильмэу «Культурэм иухъумакIохэр» дгъэпсыгъэ. Ар сэнэхьатхэм афэгъэхьыгъэ фильм къодыеп, лъэпкъым икультурнэ кодрэ блэкIыгъэр, джырэ уахътэр, къэкIощтыр нэрымылъэгъу Iуданэм зэрэзэрипхырэм фэгъэхьыгъэ зэдэгущыIэгъоу щыт. Мы проектымкIэ мурадэу тиIагъэр культурэр къэгъэлъэгъуапIэм щыплъэгъу къодыеу щымытэу, ар непэ тищыIэныгъэ пытэу зэрэхэтыр къитIотыкIыныр ары, — къыIуагъ Ацумыжъ Адам.ТекIоныгъэ къыдэзыхыгъэ фильмымкIэ кинофестивалыр зэфашIыжьыгъ.ЛъэпшъыкъоФатим.