Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ Мыекъопэ районым щыпсэурэ бзылъфыгъэу илъэс 40 зыныбжьым уголовнэ Iоф къыфиIэтыгъ.
Урысыем и Уголовнэ кодекс ия 280-рэ статья ия 2-рэ Iахь къыдилъытэрэ бзэджэшIагъэ ащ зэрихьагъ, къэбар жъугъэм иамалхэр ыкIи электрон хъытыухэр, Интернетыр къызфигъэфедэхэзэ, экстремист IофшIэным къыфаджэщтыгъ.ЗэрагъэунэфыгъэмкIэ, бзылъфыгъэм ежь иаккаунт къызфигъэфедэзэ, хэгъэгу кIоцI IофхэмкIэ къулыкъухэм яIофышIэхэм жъалымыгъэкIэ адэзекIогъэн зэрэфаемкIэ иеплъыкIэхэм къадырагъэштэным къыфаджэщтыгъ. Ащ дэгъоу къыгурыIощтыгъ ар къызфаджэрэр цIыфыбэмэ алъыIэсын зэрилъэкIыщтыр.Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэрэ Адыгэ Республикэм хэгъэгу кIоцI IофхэмкIэ и Министерствэ экстремизмэм пэуцужьыгъэнымкIэ и Гупчэ иIофышIэхэмрэ зэшIуахыгъэ Iофтхьабзэхэм къакIэкIогъэ материалхэм атетэу уголовнэ Iофыр къаIэтыгъ.IэубытыпIэхэр икъоу къэгъэшъыпкъэжьыгъэнхэм тегъэпсыхьэгъэ зэхэфын Iофхэр мы лъэхъаным макIох.