Яблэнэрэ чIыпIэм къэкIуагъ

ФутболымкIэ Урысыем ипервенствэ иятIонэрэ лигэ щешIэрэ «Зэкъошныгъэм» я 28-рэ турым къыдыхэлъытагъэу Луганскэ къэзыгъэлъэгъорэ «Зарям» Мыекъуапэ щыдешIагъ.

«Зэкъошныгъ» — «Заря» — 2:1 (0:0)«Зэкъошныгъэм» щешIагъэх:Хачировыр (къэлэпчъэIут), Черджиевыр, Солоп, Къэбжыр (Едыджыр), Датиевыр (Блэгъо­жъыр), Цанава, ХъуакIор, Хьэхыр (Iащэр), Коблыр (Хьапыщтыр), Къонэр (Малыш), Делэкъор.Тренер шъхьаIэр: Александр Кайвановыр.«Зарям» хэтыгъэх:Зновенкэр (къэлэпчъэIут), Михайловыр, Антонец, Кукановыр, Романовыр, Глущенкэр (Демченкэр), Циндрик, Агаповыр, Титаренкэр, Муромскэр (Ознобихиныр), Ушаковыр (Шараповыр).Тренер шъхьаIэр: Александр Масловыр.«Зэкъошныгъэмрэ» «Зарямрэ» мыр яятIонэрэ зэIукIэгъугъ, апэрэр 1:1-у аухыгъ. Республикэм икъэлэ шъхьаIэ щыкIогъэ ешIэгъу­ми пчъагъэр зэфэдизэу аухыным командэхэр пэблэгъагъэх. ХьакIэхэр нахьыбэрэ ыпэкIэ илъы­гъэх, къэлапчъэм IэгоуитIу да­дзагъ, ау шапхъэхэр зэраукъуагъэ­хэм къыхэкIэу ахэр халъытагъэ­хэп. Я 84-рэ такъикъым «Зарям» икапитанэу Роман Романовыр ухъумакIохэм апхырыкIи къэлапчъэм дэуагъ, пчъагъэр 1:0 хъугъэ. «Зэкъошныгъэм» пчъа­гъэр зэфэдиз ышIынымкIэ охътэ макI къыфэнэгъагъэр. Мыщ дэжьым командэм икапитанэу Делэкъо Аскэр дэгъу дэдэу зыкъыгъэлъэгъуагъ. Я 88-рэ такъи­къым ар шъхьэкIэ къэлапчъэм дэуагъ, бгыкъум тефи, къызэкIидзэжьыгъэ Iэгуаор Сослан Черджиевым къыIэкIэхьагъ, ащ пчъагъэр 1:1 ышIыгъ. Охътэ шъхьа­Iэм хагъэхъогъэ такъикъ заулэр тифутболистхэм къызфагъэфедагъ, Делэкъом къыIэкIэхьэгъэ Iэгуаор Iэщэ Анзор фидзыгъ, ащ къэлапчъэм Iэгуаор дидзи, 2:1-у тикомандэ текIоныгъэ къыфихьыгъ.Я 28-рэ турым изэфэхьысыжьхэр:«Ангушт» — «Шахтер» — 0:2, «Спартак-Налщык» — «Чайка-М» — 2:1, «Кызылташ» — «Победа» — 4:1, «Севастополь» — «Неф­тяник» — 2:2, «Нарт» — «Рос­тов-2» — 1:3, «Зэкъошныгъ» — «Заря» — 2:1, «Рубин Ялта» — «Астрахань» — 3:1.«Зэкъошныгъэр» яблэнэрэ чIыпIэм къэкIуагъ. «Севастополь» зэнэкъокъум пэрытныгъэ щиубытыгъ. «Шахтерыр» ятIонэр, «Рос­тов-2-р» ящэнэрэ чIыпIэм щыт. КъыкIэлъыкIощт турым тикомандэ Астрахань щешIэщт.Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Севастополь» — 63
2. «Шахтер» — 56
3. «Ростов-2» — 51
4. «Победа» — 45
5. «Рубин Ялта» — 43
6. «Кызылташ» — 41
7. «Зэкъошныгъ» — 40
8. «Нарт» — 40
9. «Спартак-Налщык» — 37
10. «Заря» — 30
11. «Астрахань» — 25
12. «Нефтяник» — 24
13. «Чайка-М» — 20
14. «Ангушт» — 19
15. «Динамо-2» — 17.