А. Гусев
Адыгеим и ЛIышъхьэу КъумпIыл Муратрэ Урысыем культурэмкIэ иминистрэ игуадзэу, статс-секретарэу Жанна Алексеевамрэ Адыгэ республикэ кIэлэцIыкIу тхылъ еджапIэу агъэкIэжьыгъэм щыIагъэх.
Iофтхьабзэм хэлэжьагъэх федеральнэ инспектор шъхьаIэу Сергей Дрокинымрэ АР-м культурэмкIэ иминистрэу Аулъэ Юрэрэ.ТхылъеджапIэр къызызэIуахыгъэр илъэс 90-рэ зэрэхъугъэр мы мафэхэм хагъэунэфыкIыгъ. БэмышIэу учреждением гъэцэкIэжьын IофшIэнхэр щыкIуагъэх. Лъэпкъ проектэу «Унагъу» зыфиIорэм диштэу ащ сомэ миллион 39,8-м ехъу къыфыхагъэкIыгъ. ШIэныгъэм и Мафэ ехъулIэу мыгъэ агъэкIэжьыгъэ тхылъеджапIэм ипчъэхэр икIэрыкIэу кIэлэцIыкIухэм къафызэIуихыжьыгъ.ТхылъеджапIэм ипащэу Елена Демьянковам къызэриIуагъэмкIэ, учреждением тхылъ, урысыбзэкIэ ыкIи къэралыгъуабзэкIэ тхыгъэ хаутырэ, электрон тедзэгъу мини 112-м ехъу щаIыгъ. Илъэс къэс тхылъеджапIэм иIофышIэхэм тхылъеджэ мини 8-м ехъумэ яфэIо-фашIэхэр агъэцакIэ, литературнэ мэфэкIхэр, зэнэкъокъухэр, творческэ зэIукIэхэр зэхащэх.Хаутырэ, электрон тедзэгъухэмкIэ фонд бай тхылъеджапIэм зэриIэр УФ-м культурэмкIэ иминистрэ игуадзэу Жанна Алексеевам къыхигъэщыгъ, цифрэ фэIо-фашIэхэм язегъэушъомбгъункIэ пащэхэм гухэлъэу яIэр зэригъэшIагъ. Учреждением ипащэ зэрэхигъэунэфыкIыгъэмкIэ, ящыкIэгъэ къэбархэр тхылъеджэхэм къызщызIэкIагъэхьан, яунэ щеджэнхэу аштэгъэ тхылъхэм япIалъэ лъагъэкIотэн зыщалъэкIыщт чат-бот джыдэдэм агъэфедэу фежьагъэх. Республикэм илъэгъупхъэ чIыпIэхэм афэгъэхьыгъэ къэбархэр зэрыт интерактивнэ картэм изэхэгъэуцони ыкIэм фэкIо.«Адыгеим культурэ бай иI. ЧIыпIэ тхылъеджапIэхэм тхылъхэр къазэращагъэгъунэрэм нэмыкIэу, тхылъеджэхэм амалыкIэхэр къафызэIузыхырэ цифрэ фэIо-фашIэхэри ахэм зэращагъэфедэрэм мэхьанэшхо иI. Республикэм итхылъеджапIэхэм цифровизациемкIэ IэпыIэгъоу ящыкIагъэр ядгъэгъотыным тэ тыфэхьазыр», — къыIуагъ Урысыем культурэмкIэ иминистрэ игуадзэ.КъумпIыл Мурат тхылъеджапIэм къызэкIом кIэлэцIыкIухэм адэгущыIагъ, кIэлэеджакIохэм ащыщ горэм шашкэ дешIагъ. Республикэм и ЛIышъхьэ тхылъеджапIэм иIофышIэхэм адэгущыIэзэ, республикэм и ЛIышъхьэ екIолIэкIакIэхэр агъэфедэнхэм мэхьанэшхо зэриIэр къыхигъэщыгъ.«ГъэсэныгъэмкIэ екIолIэкIакIэу жъугъэфедэхэрэм афэгъэхьыгъэу кIэлэегъаджэхэм ашIэн ыкIи IофшIэн ахэр щагъэфедэн фае. Ащ нэмыкIэу мэхьанэшхо иI политик цIэрыIохэм, наукэм, культурэм, искусствэм, спортым алъэныкъокIэ гъэхъэгъэшхохэр зышIыгъэхэм, хэушъхьафыкIыгъэ дзэ операцием иветеранхэм, дин конфессиехэм ялIыкIохэм кIэлэеджакIохэр аIугъэкIэгъэнхэм. КIэлэеджакIохэр цIыф тэрэз хъунхэмкIэ, щыIэныгъэм къащышъхьэпэщт лъэныкъохэм якъыхэхынкIэ а пстэури лъапсэ мэхъу», — къыIуагъ КъумпIыл Мурат.2025-рэ илъэсым республикэ кIэлэцIыкIу тхылъеджапIэм иIофышIэхэр кIэлэцIыкIу культурэ-просветительскэ гупчэхэм язэхэщэнкIэ зэнэкъокъум щатекIуагъэх. Ахъщэу къаIэкIэхьагъэмкIэ культурэ-просветительскэ гупчэу «Академия нескучных наук» зыфиIорэр мыщ щызэхащагъ. КIэлэцIыкIу IыгъыпIэхэм якIуалIэхэрэр, ублэпIэ еджапIэхэм ачIэсхэр зыщеджэщтхэ, творчествэм зыщыпылъыщтхэ, зызщагъэпсэфыщт чIыпIэхэр мыщ щыгъэнэфагъэх. АмалыкIэу яIэхэм яшIуагъэкIэ мультфильмхэр зэхагъэуцон, нысхъэпэ спектаклэ цIыкIухэр зэхащэн, интерактивнэ оборудованиемрэ Лъэпкъ электрон кIэлэцIыкIу тхылъеджапIэм иамалхэмрэ къызфагъэфедэхэзэ, гъэсэныгъэ, краеведческэ программэхэр зэхагъэуцон алъэкIы.АР-м и ЛIышъхьэ ипресс-къулыкъу къытырэ къэбархэмкIэ ЛIышэ Саныет