Къушъхьэ Б. ихъарзынэщ.
Непэ зисэнэхьат мэфэкI хэзыгъэунэфыкIыхэрэр уз пстэуми яIэзакIоу алъытэрэ врачхэр ары. Участковэ терапевтым ищыIэныгъэкIэ емыолIэгъэ цIыф щыIэп сIоми сыхэукъонэп къысшIошIы. Ахэм ясатыр хэтэу Iоф зышIэрэ врач ныбжьыкIэхэм ащыщ Къушъхьэ Беллэ, ар къуаджэу Блащэпсынэ дэт амбулаторием бэмышIэу Iухьагъ.
Врач ныбжьыкIэр Кощхьэблэ гурыт еджапIэу N 1-м щеджэзэ, зызфигъэзэщт сэнэхьатым тыриубытагъ. ЯунагъокIэ медицинэ сэнэхьатым рылажьэ къахэмыкIыгъэми, цIыфхэм ишIуагъэ аригъэкIыныр ежь къыхихыгъ. 2020-рэ илъэсым Мыекъопэ къэралыгъо технологическэ университетым Iэзэн IофымкIэ ифакультет чIэхьагъ.— Медицинэр сыдигъокIи сшIогъэшIэгъонэу щытыгъ. Мы сэнэхьатым зэпымыоу хэхъоныгъэ щыпшIышъущт, шIэныгъакIэхэр щызэбгъэгъотыщт ыкIи уиIэпыIэгъу зищыкIагъэу къыоуалIэрэм ебгъэгъотыщт, — къыIуагъ Къушъхьэ Беллэ.2026-рэ илъэсым апшъэрэ еджапIэр къызеухым ар ирайон гупсэ къыгъэзэжьыгъ, ичIыгогъухэм яIэзэныр къыхихыгъ. Джыри апшъэрэ еджапIэм щеджэзэ, Мыекъопэ къэлэ сымэджэщым неврологиемкIэ иотделение медицинэ сестрау Iоф щишIагъ. А уахътэм сымаджэхэм узэрадэзекIощтыр ыIэ къыригъэхьагъ.ТигущыIэгъу къызэрэхигъэщырэмкIэ, участковэ терапевтэу Iоф пшIэныр къызэрыкIоп. Врач ныбжьыкIэр зыIут амбулаторием пстэумкIи нэбгырэ 1200-рэ фэдиз къепхыгъ.— НепэкIэ пшъэрылъ шъхьаIэу сиIэр IэзэнымкIэ IэпэIэсэныгъэ зэзгъэгъотыныр, сымаджэу къысэуалIэхэрэм цыхьэ къызфязгъэшIыным сыдэлэжьэныр ары. Нэужым ординатурэм сычIэхьанышъ сэнэхьат тедзэ зэзгъэгъотын гухэлъ сиI, — хигъэунэфыкIыгъ врач ныбжьыкIэм.IофшIэныр ебгъэжьэгъакIэ хъумэ, къиныгъохэм уарихьылIэу къыхэкIы, цIыф сымаджэхэр къыпщыгугъыхэу уадэжь къызыкIохэкIэ, ахэм ялажьэр тэрэзэу бгъэунэфын ыкIи зэрищыкIагъэм тетэу уяIэзэн фае. Джащ фэдэу уврач ныбжьыкIэ зыхъукIэ цыхьэ къыпфашIыным мэхьанэ иI. А зэпстэури къыбдэхъуным пае зэпымыоу уздэлэжьэжьын, нэгушIоу уапэгъокIын, жэбзэ дахэ апэбгъохын фае. Беллэ Iоф зишIэрэр бэшIагъэп, ау зэрэфэлъэкIэу ар зэригъэцэкIэщтым пылъ. IэпыIэгъу зищыкIагъэу къеуалIэрэм сыдигъуи ишIуагъэ ригъэкIыныр пшъэрылъ шъхьаIэу зыфигъэуцужьыгъ.IЭШЪЫНЭ Сусан.