А. Гусев
Адыгеим икъэлэ шъхьаIэ мэфэкI шIыкIэм тетэу Урысые Федерациемрэ Адыгэ Республикэмрэ я Къэралыгъо быракъхэр щагъэIагъэх.
Зыгъэпсэфыгъо къэлэ паркым игупчэ дэхьэгъу дэжь щагъэуцугъэ кIэсэнхэу метрэ 40 зилъэгагъэхэм быракъхэр апалъагъэх. Ахэм яшъомбгъуагъэр метри 7,5-рэ, якIыхьагъэр — метрэ 11,25-рэ.Iофтхьабзэм хэлэжьагъэх творческэ зэхахьэхэм ялIыкIохэр, ныбжьыкIэхэр, къэлэдэсхэмрэ Мыекъуапэ ихьакIэхэмрэ.Быракъ гъэIагъэхэм агъэкIэжьыгъэ паркыр къагъэдэхагъ. Метрэ 40-кIэ ахэр чIым зэрэтеIэтыкIыгъэм ишIуагъэкIэ Мыекъуапэ ичIыпIэ зэфэшъхьафхэм уащыIэу къэралыгъо быракъхэр дэгъоу плъэгъунхэ олъэкIы. Мафэрэ ахэм къэлэ паркым итеплъэ нахь къагъэдахэ, чэщрэ быракъхэр зэрэзэпагъэнэфырэм чIыпIэр къегъэкIэракIэ.Адыгеим и ЛIышъхьэу КъумпIыл Мурат къызэрэхигъэщыгъэмкIэ, Урысыемрэ Адыгеимрэ ябыракъхэр республикэм щыпсэурэ лъэпкъхэм языкIыныгъэ, къэралыгъом итарихъ зэрагъэлъапIэрэм, неущырэ мафэр зэрэзэдагъэпсыщтым яцыхьэ зэрэтелъым ятамыгъэу щыт. Республикэм ипащэ зэрэхигъэунэфыкIыгъэмкIэ, ащ фэдэ псэуалъэхэм къалэр къызэрагъэдэхэщтым нэмыкIэу, цIыфхэр къызщызэрэугъоирэ чIыпIэхэуи хъунхэ фае.«Урысыем щыпсэурэ лъэпкъхэм языкIыныгъэ и Илъэсэу Урысые Федерацием и Президентэу Владимир Путиным ыгъэнэфагъэм мыщ фэдэ Iофтхьабзэр зэрэзэхащагъэм мэхьанэшхо иI. Хэгъэгумрэ республикэмрэ я Къэралыгъо быракъхэр лъэпкъхэр зэрэзэкъотхэм, титарихъ зэрэдгъэлъапIэрэм, ти Хэгъэгу гупсэ инеущырэ мафэкIэ пшъэдэкIыжь зэрэтхьырэр къызэрэдгурыIорэм ятамыгъэу щыт», — къыIуагъ КъумпIыл Мурат.КIэсэнхэр зэрагъэуцугъэр Мыекъуапэ изэтегъэпсыхьанкIэ Iофышхоу зэшIуахыщтым изы Iахь ныIэп. Ащ фэдэ IофшIэнхэр зыфытегъэпсыхьагъэхэр Адыгеим икъэлэ шъхьаIэ дэсхэмкIи, ихьакIэхэмкIи Iэрыфэгъоу щытыщт общественнэ чIыпIэхэр джырэ шапхъэхэм адиштэу шIыгъэнхэр ары.