Гъогухэр агъэкIэжьых

Щынэгъончъэ ыкIи шэп­хъэ­шIухэм адиштэрэ гъо­гухэм язэтегъэпсыхьан республикэм ихэбзэ къулы­-къухэм анахьэу анаIэ зытырагъэтырэ лъэныкъо­хэм ащыщ. Федеральнэ IэпыIэгъур къызфагъэфедэзэ, цIыфхэмкIэ Iэрыфэгъоу, щынэгъончъэу щытыщт гъо­гухэр Адыгеим щагъэпсых.Гъогу хъызмэтым иIофы­шIэ пэпчъ ыкIуачIэ, иIэпэ­Iэсэныгъэ ащ хэлъ.

ГъогушIыным, гъэцэкIэжьыным апае республикэм ГъогухэмкIэ ифонд имылъку, чIыпIэхэм хэхъоныгъэ зэ­рарагъэшIырэ, лъэпкъ проектэу «ЩыIэныгъэм пае инфраструктурэр» зыфи­Iорэм къыщыдэлъытэгъэ амалхэр къыз­фагъэфедэх. Къэлэ автомобиль гъогухэм япроцент 89-рэ фэди-зыр, шъолъыр, муниципальнэ мэхьанэ зиIэ гъогухэм япроцент 73-рэ фэдизыр шапхъэхэм адиштэу зэтырагъэ­псыхьагъэх.2026-рэ илъэсым лъэпкъ проектэу «ЩыIэныгъэм пае инфраструктурэр» зыфиIорэм диштэу сомэ миллиарди 5,2-рэ фэдиз къатIупщыгъ. Километрэ 73,6-рэ зикIыхьэгъэ автомобиль гъогу­хэм яIахь 28-рэ агъэцэкIэжьыгъ. Илъэсыр имыкIызэ лъэмыджи 4-мэ гъэцэкIэжьын IофшIэнхэр арашIылIэщтых. ПсэупIэу Яблоновскэмрэ Мыекъуапэрэ ягъогухэм язытет лъэшэу гъунэ лъафы. Федеральнэ гъогуитIур зэзы­пхырэ ура­мэу Хьахъуратэм ыцIэ зыхьырэр ахэм зэу ащыщ. Мыгъэ ащ гъэцэкIэжьын мыинхэр щыкIощтых. Хэбзэ къулыкъу­хэм тапэкIэ мурадэу яIэр игъэ­кIотыгъэ гъэ­цэкIэжьынхэр ащ ешIы­лIэгъэнхэр ары.

Къалэу Мыекъуапэ къэзыухьэрэ автомобиль гъогум ишIынкIэ епхыгъэ проектыр мы гъогум епхыгъ. ГъэрекIо къыщегъэжьагъэу километрэ 11,148-рэ зикIыхьэгъэ мы автомобиль гъогум иаужырэ Iахь Iоф дашIэ. Хьахъуратэм иурам транзитнэ, транспорт хьылъэхэр щыземыкIонхэу, зекIохэр нахь кIэкIэу къушъхьэлъэ чIыпIэм лъыIэсынхэу ащ амал къытыщт.Джащ фэдэу гъогухэмкIэ ГъэIоры­шIапIэу «Черноморьем» игъусэхэу проектышхо заулэмэ ягъэцэкIэн ыуж итых. Ащ хэхьэ автомобиль гъогоу А-160 зыфиIоу Мыекъуапэ — Бжъэдыгъу-хьаблэ — Адыгэкъалэ — Лэбапэ — Кореновскэ зэзыпхырэм игъэцэкIэжьын. Мы гъогум хэхьэрэ километри 3-р шъо­лъыриплIэу зэтыраутыщт. Ащ нэмыкIэу псыхъоу Шъхьэгуащэ телъ лъэмыджри агъэцэ­кIэжьыщт. ШъолъыриплIэу зэтыраутыщт гъогур джырэ шапхъэхэм адиштэщт. 2027-рэ илъэсым ыкIэ нэс псэуалъэр атIупщынэу рахъухьэ. Гъогу­хэмкIэ Гъэ­IорышIапIэу «Черноморьем» игъусэхэу нэмыкI Iофыгъуи зэшIуахы — А-146-рэ зыфиIорэ гъогум иIахь агъэкIэжьы, псэупIэхэу Яблоновскэмрэ Инэмрэ азыфагу гъогу зэхэкIыпIакIэ щагъэпсы.Федеральнэ IэпыIэгъум ишIуагъэкIэ республикэм икъушъхьэлъэ чIыпIэхэм гъогушIыным защырагъэушъомбгъу. Мыгъэ автомобиль гъогоу «Гъозэрыплъ — Лэгъонакъ» зыфиIорэм изы Iахь ишIын аухыгъ. Мы автомобиль гъогум инэмыкI Iахьэу километри 7,4-рэ зикIыхьагъэм ишIын фежьагъэх. ЫпэкIэ Росавтодорыр IэпыIэгъу къафэ­хъузэ, автомобиль гъогоу «Дахъо — Лэгъонакъэ» зыфиIорэм щыщэу метрэ 900-рэ агъэкIэжьыгъагъ, автомобиль гъогоу «Дахъо — ДжэгокIо гъэхъун» зыфиIорэр агъэпсыгъагъ. ЗекIохэр на­хьыбэу къушъхьэлъэ чIыпIэхэм ащы­IэнхэмкIэ мыщ фэдэ IофшIэнхэм мэхьанэшхо яI.Республикэм игъогухэр щынэгъон­чъэнхэм пае камерэ 240-рэ атыра­гъэуцуагъ. Мыекъуапэрэ Тэхъутэмыкъое районымрэ мобильнэ аппарат-программэ комплексэу «Тайфун» зыфиIо-рэм фэдитIу ащагъэфедэ, республикэм ичIыпIи 8-мэ транспортым ионтэгъугъэ ащащэчы.Мы зэпстэуми мылъкум дакIоу цIыфхэм акIуачIэ ахэлъ, мы лъэныкъом Iоф щызышIэхэрэм зэшIуахырэр пстэуми янэрылъэгъу, зэдэтэгъэфедэ.