Шъолъырхэм азыфагу зэхащэгъэ я 9-рэ фестиваль-зэнэкъокъоу «Дышъэ тандж» зыфиIорэр Тэхъутэмыкъое районым щыкIуагъ. Лъэпкъ проектэу «Унагъом» ар къыдыхэлъытагъ.
— Культурэм епхыгъэ зы проектэп непэ къэдгъэлъагъорэр, илъэс пчъагъэхэм тыздэлэжьэрэ IофшIэным ар изэфэхьысыжь. Республикэм щыпсэухэрэр зыщызэрэугъоихэрэ, ясэнаущыгъэ зыщыхагъахъорэ культурэм иунэхэм непэ тащыкIэрэп. Iофтхьабзэу Тэхъутэмыкъое районым зэхищагъэм адрэ районхэми щысэ тырахынышъ, проектыкIэхэр къаугупшысынхэу, нэужым ахэм зырагъэушъомбгъунэу тэгугъэ, — мыщ фэдэ гущыIэхэмкIэ «Дышъэ танджыр» къызэIуихыгъ АР-м культурэмкIэ иминистрэ игуадзэу ПхъэчыяшIэ Суандэ.Iофтхьабзэм хэлажьэхэрэр зэкIэ адыгабзэкIэ гущыIэнхэр зэнэкъокъум ишэпхъэ шъхьаI. Икъу фэдизэу бзэр зыIэкIэмылъхэми ар агъэцэкIагъ. Фестивалым иосэшIхэм къызэраIорэмкIэ, орэдымкIэ, усэхэмкIэ бзэр нахь зэгъэшIэгъошIу.— Зэо лъэхъаным сиадыгэ лъэпкъ чIэнэгъэшхоу ышIыгъэм фэгъэхьыгъэ усэм сыкъеджагъ. Ащ сыгу лъэшэу къыгъэбырсырыгъ, цIыфэу къысэдэIугъэхэми алъызгъэIэсы сшIоигъуагъ, — къыIуагъ фестиваль-зэнэкъокъум хэлэжьэгъэ Барцо Дианэ.Адыгэхэм якультурэ баи, лъэныкъуаби къызэлъеубыты. Ар къыдалъытэзэ Iофтхьабзэм хэлэжьагъэхэм лъэныкъуиплIыкIэ зыкъагъэлъэгъуагъ: орэдыIоныр, къэшъоныр, лъэпкъ музыкальнэ Iэмэ- псымэхэм къягъэIогъэныр ыкIи художественнэ гущыIэр.Фестиваль-зэнэкъокъум хэлэжьагъэхэр аныбжь елъытыгъэу купищэу гощыгъагъэх. Гран-прир ыкIи сомэ мини 100 хъурэ шIухьафтыныр зыхьыгъэр НапцIэкъо Лаур. Пэнэжьыкъуае щыщ пшъашъэм «Чъые, чъые цIыкIужъый» зыфиIорэ орэдыр къыIуагъ. Ар кIэлэегъаджэу Светлана Панченкэм егъасэ. Фестивалым еплъыгъэхэм нахь агу рихьыгъэр адыгэ музыкальнэ Iэмэ-псымэхэм къязыгъэIорэ купэу «Насыпыр» ары.Цэй Замир.