Нэбгыри 10 агъэкIотагъ

Адыгеим щыщхэу Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм язичэзыу куп чъэпыогъум и 13-м гъогу техьагъ. КъулыкъушIэ нэбгыри 10-р мэфэкI шIыкIэм тетэу агъэкIотагъэх. Ахэм Севастополь къулыкъур щахьыщт.

МэфэкI Iофтхьабзэу АР-м идзэ комиссариат щыкIуагъэм хэлэжьагъэх республикэм игъэцэкIэкIо хэбзэ къулыкъухэм, патриотическэ ыкIи общественнэ организациехэм ялIыкIохэр, дзэ къулыкъум иветеранхэр, ны-тыхэр.

НыбжьыкIэхэм къулыкъур щытхъу хэлъэу къахьынэу, цыхьэшIэгъу ныбджэгъухэр агъотынхэу, я Хэгъэгу рыгушхон­хэу офицерхэр ыкIи хьакIэхэр къафэлъэIуагъэх.

АР-м идзэ комиссар шъхьаIэу А. Авериным къызэриIуагъэмкIэ, бжыхьэ дзэ дэщыгъор зэрифэшъуашэу респуб­ликэм щылъэкIуатэ. Ащ къыдыхэлъытагъэу зичэзыу ныбжьыкIи 10-р зэрагъэ­кIуатэхэрэр ыкIи мы къулыкъушIэхэр зэпэуцужьхэр зыщыкIорэ чIыпIэхэм зэрамыщэщтхэр ащ къыхигъэщыгъ.

Къыблэ дзэ шъолъырым изэхэт стратегическэ командование иинспекторхэм ащыщэу, генерал-майорэу Юрий Калягиным Хэгъэгум къулыкъу фэхьыгъэным игъогу ахэр непэ зэрэтеуцуагъэхэр къыхигъэщыгъ.

— ЩыI сэнэхьатэу «Хэгъэгур къэухъу­мэгъэныр». Ащ епхыгъэу Хэгъэгум ыпашъхьэ пшъэдэкIыжьэу щышъуиIэр гъэцэкIэгъэным игъо къэсыгъ. Непэ къэралыгъо пчъагъэхэр Урысыем къыпэ­уцугъэхэу ушэтыпIэм тызщит лъэхъаным пшъэрылъэу къэуцухэрэр къызэрыкIохэп. Шъо чIыпIэ «плъырхэм» шъуащэщтэп, ау зыщырэхьат чIыпIэу шъуздэщыIэщтхэм пшъэрылъэу къыщышъуфагъэуцухэрэр шIокI имыIэу жъугъэцэкIэнхэ фае. Тя­тэжъхэм, тидзэкIолIхэу хэушъхьафыкIыгъэ дзэ операцием хэлажьэхэрэм лIыхъужъныгъэу, псэемыблэжьныгъэу зэрахьэрэр щысэтехыпIэу шъуиIэнхэу щыт. Дзэ къулыкъум хъулъфыгъэм ишэн-зекIуакIэхэр псыхьагъэ щэхъух, шъуизэхэшIыкI нахьыбэ къыхьыщт. Илъэ­сэу шъукъызэрэтыщтыр бэп, псынкIэу кIощт. Нэужым зэзэгъыныгъэ шIыкIэм тетэу къулыкъур шъуащыщхэм лъагъэ­кIотэнкIи хъун. Сыд фэдэрэ лъэныкъо зыжъугъэзэжьэщтми, шъуипсауныгъэ зэщымыкъоу ны-тыхэм къафэжъугъэзэ­жьынхэу сышъуфэлъаIо, — хигъэунэфыкIыгъ генерал-майорым.

Дзэ къулыкъум бгъэкIотэнхэр — ны-тыхэмкIи, ныбжьыкIэхэмкIи гумэкIыгъо мафэу щыт.

— ТикIалэхэм ящыIэныгъэкIэ мэхьанэ зиIэ едзыгъу мыр, тафэмыгумэкIын тлъэкIырэп. Сицыхьэ телъ хэти шэнышIоу хэлъхэр къызэригъэлъэгъощтым, дзэ пшъэрылъхэр шIокI имыIэу зэригъэцэкIэщтым. НыбжьыкIэхэр псаухэу, узынчъэ­хэу къытфагъэзэжьынэу сафэлъаIо, — къыIуагъ къулыкъушIэхэм ащыщ янэу Надежда Кименчиже.

НыбжьыкIэу гъогу техьагъэхэм ацIэкIэ Мамый Алим къэгущыIагъ.

— Непэ тикъэралыгъо ищынэгъончъа­гъэ дзэкIолIхэм пытагъэ ахэлъэу къызщаухъумэрэ лъэхъаным, тэ, ныбжьыкIэ­хэм, а шIэныгъэхэр тIэ къидгъэхьанхэр типшъэрылъ. СыдигъокIи Адыгэ Респуб­ликэм ыцIэ дахэкIэ зэрарагъаIорэм тетэу щытхъу хэлъэу къулыкъур зэрэтхьыщтымкIэ гущыIэ къэтэты, — хигъэунэфыкIыгъ ащ.

Мыекъопэ гарнизоным иофицерхэм я Унэ къыгъэхьазырыгъэ концертымкIэ Iофтхьабзэр аухыгъ. Нэужым гъогу техьэрэ къулыкъушIэхэр агъэкIотагъэх.

Iэшъынэ Сусан.