Мэхьанэшхо зиIэ спорт форумэу «Хэгъэгум иухъумакIохэм я Кубок» зыфиIорэр къалэу Краснодар щыкIуагъ.
Зэо зэфэшъхьафхэм шъобж хьылъэ ахэзыхыгъэ ыкIи уIагъэ къызытыращэгъэ ветеранхэр мыщ зэрипхыгъэх. Турнирыр лIыжъужъныгъэм, ныбджэгъуныгъэм ятамыгъэ хъугъэ.
Мы илъэсым Кубокым икъыдэхын спортсмени 120-рэ хэлэжьагъ. Къыблэ федеральнэ шъолъырым имызакъоу, Донецкэ ыкIи Луганскэ народнэ республикэхэм, Запорожскэ ыкIи Херсонскэ хэкухэм ялIыкIохэм заушэтыгъ. Турнирым ипрограммэ спорт лъэныкъуибл къыдыхэлъытэгъагъ: щэ щэрыоныр, классическэ щэбзэ щэрыоныр, теннис цIыкIур, шоудауныр (зымылъэгъурэ спортсменхэм афытегъэпсыхьэгъэ теннис цIыкIур), пауэрлифтингыр, спорт шъэжъые дзыныр, щысхэу волейболыр.Щэбзэ щэрыонымкIэ шъолъырыр зэнэкъокъум къыщагъэлъэгъуагъ Эдуард Бараевымрэ Александр Гоевымрэ. ТIури зыгъасэхэрэр олимпийскэ резервым испорт еджапIэу В. С. Максимовым ыцIэ зыхьырэм итренер-кIэлэегъаджэу, Урысыем спортымкIэ имастерэу Александр Баламутовыр ары. Эдуард Бараевым ухьазырыныгъэ дэгъу къыгъэлъэгъуагъ ыкIи дышъэ медаль къыхьыгъ. Александр Гоевми IэпэIэсэныгъэшхо зэрэхэлъыр къыушыхьатыжьыгъ, ар яплIэнэрэ хъугъэ.
Ветеранхэр щыIэныгъэм хэгъэгъозэжьыгъэнхэр, ахэм ныбджэгъукIэхэр къагъотынхэр, шъобжхэм ыкIи уIагъэхэм ауж щыIэныгъэ зэрэлъыкIуатэрэр зэхягъэшIэгъэныр, спортым ылъэныкъокIэ гъэхъэгъэшIухэр ашIынхэр турнирым изэхэщакIохэм япшъэрылъ шъхьэIагъ.