Ошъогур шIу зылъэгъугъэр

Мыекъуапэ щыщ Шъхьабэ Темыр игухэлъ — гражданскэ авиацием ипилот хъуным екIурэ гъогум апэрэ лъэбэкъур щидзыгъ.

ИцIыкIугъом къыщегъэжьагъэу ащ къухьэлъатэхэр икIасэх. Игухэлъ къыдэхъуным пае Темыр дэгъу дэдэу Адыгэ республикэ гимназиер къыухыгъ, апшъэрэ еджапIэм къыщышъхьэпэщт предметхэм, гущыIэм пае, хьисапымрэ физикэмрэ нахь ягугъугъ. ЗыкI къэралыгъо ушэтынхэм балли 100 физикэмкIэ къыхьыгъ. Зигухэлъ фэшъыпкъэ кIалэр гражданскэ авиациемкIэ Ульяновскэ институтэу авиацием имаршалэу Б. П. Бугаевым ыцIэ зыхьырэм чIэхьагъ.

Гъэсэныгъэмрэ шIэныгъэмрэкIэ Адыгэ Республикэм и Министерствэ къызэрэщытфаIотагъэмкIэ, гражданскэ авиациемкIэ Ульяновскэ институтыр Урысыем иапшъэрэ еджэпIэ анахьыжъхэм ащыщ, ар IэпэIэсэныгъэ ин зыхэлъ пилотхэр, диспетчерхэр, авиацием епхыгъэ фэшъхьаф специалистхэр зыгъэхьазырырэ еджэпIэ пэрытхэм ащыщ.

— Мы институтым сычIэхьаным илъэс заулэ­рэ сыкIэхъопсыгъ. БэшIагъэу сиIэгъэ гухэлъыр къызэрэздэхъугъэм гушхуагъэ къыс­хелъхьэ! — игуапэу къеIуатэ Темырэу «Быбыным епхыгъэ IофшIэнхэм язэхэщэн» зыфиIорэ факультетыр къыхэзыхыгъэм, зыфеджэрэ лъэны­къор «Къухьэлъатэхэм ягъэцэкIэжьын ыкIи ябыбын епхыгъэ зэхэщэн Iофхэр».

Летчик сэнэхьатым феджэрэ Шъхьабэм ылъапсэ хы ШIуцIэ Iушъом щыпсэурэ шапсыгъэмэ къащежьэ. Ащ ятэжъэу Шъхьабэ Саид Анзаур ыкъор физическэ культурэмрэ спортымрэкIэ Адыгеим изаслуженнэ IофышI, илъэсыбэрэ Мыекъопэ футбол клубэу «Зэкъош­ныгъэм» ыкIи республикэ стадионэу «Зэкъошныгъэм» япэщагъ, джырэ уахътэм а стадионым игенеральнэ пащэ игуадз, къуаджэу Хьаджыкъо щыщ. Янэжъ Къо­джэшъэо Щамсэт Щамсудинэ ыпхъур ТIопсэ шъо­лъырым ит къуаджэу ШIоикъо къыщыхъугъ, илъэс пчъагъэхэм Адыгэ Республикэм и Къэралыгъо Совет — Хасэм иIофхэмкIэ ГъэIорышIапIэм ипащэу, и Аппарат ипащэ игуадзэу Iоф ышIагъ. Ятэу Налбый Адыгэ Республикэм изаслуженнэ юрист, илъэс 20-рэ АР-м и ЛIышъхьэрэ министрэхэм я Кабинетрэ я Администрацие щылэ­жьагъ. Ащ щыщэу илъэс 14-м АР-м и ЛIышъхьэрэ министрэхэм я Кабинетрэ я Администрацие къэралыгъо къулыкъумкIэ ыкIи кадровэ политикэмкIэ и ГъэIорышIапIэ ипащэу щытыгъ. 2024-рэ илъэсым къыщыуб­лагъэу Iахьзэхэлъ обществэу «Газпром газо­распределение Майкоп» зыфиIорэм игенеральнэ пащэ игуадзэу мэлажьэ.

Адыгабзэр дэгъоу зышIэрэ ыкIи гущыIэрэ Шъхьабэ Темыр авиацием шIулъэгъоу фыриIэм фэшъхьафэу лъэныкъуабэхэмкIэ зеушэты: спортым чанэу пылъ, шыкIэпщынэм къырегъаIо.

Ныбэ Анзор.