Олимпийскэ резервым и Мыекъопэ спорт еджапIэу В. С. Максимовым ыцIэ зыхьырэм зыщызыгъэсэгъэ НатIэкъо Мэдинэ итекIоныгъакIэхэмкIэ тегъэгушIо.
Урысыем щыпсэурэ лъэпкъхэм я Спартакиадэ къыдыхэлъытагъэу баскетболымкIэ (3 x 3) зэнэкъокъум дышъэ медаль къыщихьыгъ. Республикэм илIыкIо Москва ихэшыпыкIыгъэ командэ хэтыгъ.Зэнэкъокъум икIэух едзыгъоу къалэу Екатеринбург щыкIуагъэм къэралыгъом икомандэ анахь лъэшхэр хэлэжьагъэх. Финалым Москварэ Пермскэ краимрэ щешIагъэх, апэрэхэр нахь лъэшыгъэх, 21:18-у текIоныгъэр къыдахыгъ. Москва ибаскетболистхэм пэрытныгъэр аубытыным иIахьышIу хэлъ НатIэкъо Мэдинэ. Мы илъэсымкIэ ар ятIонэрэ гъэхъэгъэ ин. Урысыем иныбжьыкIэ командэ хэтэу FIBA 3 x 3-м къыдыхэлъытэгъэ лъэпкъхэм ялигэ иазиатскэ едзыгъоу бэдзэогъум рагъэкIокIыгъэм дышъэ медаль къыщихьыгъ.
НатIэкъом игъэхъагъэхэм джыри зэ къаушыхьаты тишъолъыр сэнаущыгъэ зыхэлъ спортсменхэмкIэ зэрэбаир.