Лъэс зекIонымкIэ Урысыем ичемпионат яплIэнэрэу хэлажьэ республикэм икъэлэ шъхьаIэикомандэу «Мыекъуапэ 01-р». Ар Iоныгъом и 27-м рагъэжьагъ ыкIи чъэпыогъум и 27-м нэс кIощт.
Мы илъэсым къэралыгъом ишъолъыр зэфэшъхьафхэм якомандэ 548-мэ заушэты. Мыекъуапэ къэзыгъэлъагъорэм нэбгырэ 13 хэт: Сергей Александровыр, Николай Артемьевыр, Бзаго Рустам, Мария Донсковар, Олег Колосовскэр, Надежда Михальцовар, Александр Муравскэр, Псэунэ Назир, Ирина Пыловар, Псэунэ Саидэ, Татьяна Селиверстовар, Щэбанхэу Асятрэ Рэмэзанрэ.
ЗэхэщакIохэм зэрагъэнэфагъэмкIэ, командэм хэт нэбгырэ пэпчъ мафэм лъэбэкъу мин 25-м нахь мымакIэу къыкIун фае. Нэужым ахэр зэкIэ зэхагъэхъожьых, пшъэрылъыр зымыгъэцэкIагъэхэм баллхэр атырахых.
Джырэ уахътэм ехъулIэу Мыекъуапэ икомандэ ятIонэрэ чIыпIэм щыт, пэрытныгъэр ыIыгъ Саратов къэзыгъэлъэгъорэ «Скорый 64» зыфиIорэм. Мэфэ 13-м ыуж командиплIымэ очко чIанагъэп, ахэм республикэм икъэлэ шъхьаIэ ащыщ.
«Мыекъуапэ 01-р» мыщ ыпэрэ илъэсхэм лъэныкъоу «муниципалитетхэр» зыфиIорэм зыщиушэтыгъ. ТIогъогогъо джэрз медальхэр къыхьыгъэх, зэ ятIонэрэ хъугъэ. Арышъ, къэнэгъэ тхьамэфитIум ехъум тикомандэ хэтхэм джыри нахь рагъэхъущт, текIоныгъэм фэбэнэщтых.