Кинофестивалэу «Саусэрыкъо дышъ» зыфиIорэм исайт онлайн-мэкъэтыныр къыщызэIуахыгъ. Хэгъэгуи 6-мэ къарыкIыгъэ фильм 73-у сайтым къырагъэхьагъэмэ цIыфхэр яплъынхэ алъэкIыщт.
ОсэшI купым цIыфхэм яшIошI къыдилъытэзэ, «Приз зрительских симпатий» зыфиIорэ лъэныкъор агъэнэфэщт. Анахь агу рихьыгъэхэм амакъэ афатын амал мы тхьамафэм яIэщт. Кинофестивалым икIэщакIоу, режиссерэу, АР-м ыкIи КъБР-м искусствэхэмкIэ язаслуженнэ IофышIэу, УФ-м икинематографистхэм я Союз иотделениеу АР-м щыIэм ипащэу Нэгъэплъэ Аскэрбый зэрэхигъэунэфыкIыгъэмкIэ, къырахьылIэгъэ IофшIагъэхэм ащыщ фильми 10-р Адыгеим ирежиссермэ яIофшIагъэх. Зэнэкъокъум хэлажьэхэрэм лъэныкъуищкIэ заушэты: анимационнэ, документальнэ джэгукIэ шIыкIэр ыкIи нейросетим иамалкIэ гъэуцугъэ кинор.
— Адыгэ Республикэр дунаим нахь щызэлъашIэным Iофтхьабзэр фэIорышIэ. Урысыем щыпсэурэ лъэпкъхэм языкIыныгъэ, лъэпкъ зэфыщытыкIэхэр ыкIи ныбджэгъуныгъэр гъэпытэгъэнхэм, яхэгъэгу шIу алъэгъоу лIэужыкIэхэр пIугъэнхэм, къэралыгъо ыкIи IэкIыб кином хэхъоныгъэ ашIыным фестивалыр афытегъэпсыхьагъ. Лъэпкъ культурэм икъэухъумэнрэ ихэхъоныгъэрэ Адыгеим иныбжьыкIэхэр хэгъэлэжьэгъэнхэр, кIэлакIэхэр кинематографием фэщэгъэнхэмкIэ IэпыIэгъу афэхъугъэныр, режиссер сэнаущхэр къыхэгъэщыгъэнхэр, яIоф фэгъэчэфыгъэнхэр тимурад шъхьаIэх, — къыIуагъ Нэгъэплъэ Аскэрбый.
Урысыем икинематографистхэм я Союз иотделениеу АР-м щыIэр зикIэщэкIо кинофорумым 2026-рэ илъэсым дунэе мэхьанэ иIэ хъугъэ. Къэралыгъо 22-мэ якинематографистхэм яIофшIагъэхэр къырахьылIагъ. ЗэхэщэкIо комитетым лъэIу тхылъ 1081-рэ къыфагъэхьыгъ.
Кинофестивалым ипрограммэ къыдыхэлъытагъэу апэрэу лъэпкъ зэнэкъокъу хагъэхьагъ. Адыгеим икинорежиссермэ тырахыгъэ документальнэ джэгукIэ шIыкIэ зиIэ IофшIэни 10 зэнэкъокъум хагъэхьагъ. «Хранители культуры», «Магия орнамента», «В единстве сила», «Нальмэс: танец длиною в жизнь», «Орнамент жизни» ыкIи нэмыкIхэр.
Я VI-рэ кинофестивалэу «Саусэрыкъо дышъ» зыфиIорэр чъэпыогъум и 14-м щыублагъэу и 16-м нэс Мыекъуапэ щыкIощт.
Лъэпшъыкъо Фатим.