Росреестрэм АР-мкIэ и ГъэIорышIапIэ чIыгу Iахьэу псэупIэхэм, чъыгхэтэ товариществэхэм ащамыгъэфедэхэрэм афэгъэхьыгъэ «линие плъырэу» зэхищэгъагъэм икIэух зэфихьысыжьыгъ. УпчIэхэм джэуапхэр аритыжьыгъэх къэралыгъо чIыгум лъыплъэнымкIэ отделым ипащэ игуадзэу Родион Башлыковым.
?Мы илъэсым чъыгхэтэ товариществэм чIыгу Iахь къыщысщэфыгъ. Ар зэрэзгъэфедэн фаем сыд фэдиза пIалъэу пылъыр.
2024-рэ илъэсым шышъхьэIум и 8-м къыдэкIыгъэ федеральнэ хэбзэгъэуцугъэу 2025-м игъэтхапэ и 1-м кIуачIэ зиIэ хъугъэм къызэрэщыдэлъытагъэмкIэ, псэупIэм е чъыгхэтэ товариществэм чIыгу Iахь щызыщэфыгъэм илъэсищым шIомыкIэу ар ыгъэфедэн фае.
2025-рэ илъэсым гъэтхапэм и 1-м ыуж къэзыщэфыхэрэм ар зыщарагъэтхыгъэм пIалъэри къыщежьэ. Ау ащ ыпэкIэ чIыгу Iахьыр къызIэкIэхьагъэхэм 2025-рэ илъэсым игъэтхапэ и 1-м къыщыублагъэу къафалъытэщт.
?ЧIыгу Iахь сиI, ау илъэс благъэхэм унэ щысшIын гухэлъ сиIэп. ЧIыгур чIэсымынэным пае сыда сшIэн фаер.
Унэ щишIынэу чIыгу Iахь зэзыгъэгъотыгъэм илъэси 7-м ехъугъэу ар тыримыгъэуцуагъэу ыкIи аримыгъэтхыгъэмэ, хэбзэгъэуцугъэр ыукъуагъэу мэхъу. Хьыкумым ышIыгъэ унашъом тетэу чIыгу Iахьыр зием унэм ишIын ымыухыжьыгъэмэ, мыщ къыхиубытэрэп.
Арэу щытми, къыдэлъытэгъэн фаер чIыгу Iахьыр 2025-рэ илъэсым гъэтхапэм и 1-м ыпэкIэ къызэрэпщэфыгъэр ары. Ащ фэшI илъэси 7 пIалъэр ащ къыщежьэу мэхъу, 2032-м игъэтхапэ иапэрэ мафэ нэс уахътэ уиI.
?ЧIыгу IофхэмкIэ инспекторым хэукъоныгъэхэм сынаIэ атырысигъэдзагъ, ахэр зэрыт тхылъ къыситыгъ. Сыда сшIэн фаер.
Тхылъым итым зыщыгъэгъуаз, хэбзэгъэуцугъэр укъуагъэ мыхъуным фэшI узэрэзекIомэ нахьышIоу къытхыгъэхэр гъэцакIэх. УпчIэ уиIэ хъугъэмэ, инспекторым уфытеомэ хъущт. Тхылъым итхагъэм демыгъаштэрэмэ, ар къызщипIотыкIырэ тхылъ мэфэ 30 темышIэзэ птын фае. Ащ хэплъэнхэшъ, джэуап къыуатыжьыщт.
ПшIэн фаер инспекторым ащ фэдэ тхылъэу къытыгъэм административнэ пшъэдэкIыжь зэрэпымылъыр ары. ЧIыгу Iахь зиIэхэм шапхъэхэр агу къэгъэкIыжьыгъэнхэм, ахэр аукъо зэрэмыхъущтым анаIэ тырягъэдзэгъэным ар фытегъэпсыхьагъ. ЛъыплъэкIо къулыкъум ащ фэдэ тхылъ къытыныр шIокI зимыIэ Iофэу хэбзэгъэуцугъэм къыщиIорэп.