ЧIыгу гупсэм ипоэзие

Мыекъуапэ иурам тхылъеджапIэхэм ащыщ Адыгеим имэфэкI фэгъэхьыгъэу поэзием исыхьат щызэхащагъ.

ЧIыгу гупсэр творческэ IофышIабэмэ гукъыдэчъ афэхъу — сурэтэу, орэдэу е литературэу ар щытми. Адыгеим ипоэтическэ кIэнкIэ къыддэгощагъэх Лъэпкъ тхылъеджапIэм иIофышIэхэр: поэзием исыхьатэу къагъэхьазырыгъэр респуб­ликэм ыныбжь илъэс 36-рэ зэрэхъугъэм фагъэхьыгъ.

— Адыгеир — зыфэдэ къэмыхъугъэ чIыгу, Кавказ къушъхьэшхомэ азыфагу мэзыр, губгъохэр, псыхъо чъэрхэр щыбэх. IэпэIэсэныгъэшхорэ сэнаущыгъэ инрэ зыхэлъ цIыфхэр мыщ щэпсэух. Адыгеир — лъэпкъыбэмэ яреспублик, зэгурыIохэу ахэр ащ щызэдэпсэух, чIыгу гупсэу шIу алъэгъурэм зэрепхых, — къыщаIуагъ Лъэпкъ тхылъеджапIэм.

КIэрэщэ Тембот исаугъэт дэжь Iофтхьаб­зэр щызэхащагъ. Адыгэ литературэм иухъумакIохэр, искусствэхэмкIэ респуб­ликэ колледжэу Тхьабысымэ Умар ыцIэ зыхьырэм щеджэхэрэр ыкIи хьакIэхэр мыщ къыщызэрэугъоигъэх.

Лъэпкъ тхылъеджапIэм краеведениемкIэ ыкIи лъэпкъ литературэмкIэ иотдел ипащэу ГъукIэлI Фатимэ къызэриIуагъэм­кIэ, Iофтхьабзэм «микрофон шъхьафитыр» къыделъытэ, фае пэпчъ шIу ылъэгъурэ усэм къеджэн амал егъоты.

— ГухэкIми, джырэ уахътэм тхылъеджа­пIэр бэмэ якIуапIэп. Джащ пае тыгу къэкIыгъ къалэм мыщ фэдэ Iофтхьабзэ щыредгъэкIокIынэу — урам тхылъеджапIэ. Мыекъуапэ зекIоу бэ къакIорэр, зышIогъэшIэгъонхэр къахэкIых, къыIохьэх, усэмэ къядэIух. Непэ усэмэ къяджэрэмэ янахьыбэр тхылъеджапIэм иIофышIэхэр ары, ау тилъэпкъ ыкIи тичIыгу ядэхагъэ къизыIотыкIы зышIоигъомэ зэкIэмэ тыгу­хэр афызэIухыгъэх, — къеIуатэ зэхэщакIом.

Адыгеим илитературэ ибаиныгъэ Лъэпкъ тхылъеджапIэм иIофышIэхэм Краснодар краим къыщагъэлъагъоу хъугъэ.

— Тхылъым ифестивалэу Краснодар щызэхащагъэм тыхэлэжьэгъагъ: Адыгеим фэгъэхьыгъэ тхылъхэр тщэгъагъэх. Тилитературэ зышIогъэшIэгъоныгъэр багъэ. Зы бзылъфыгъэ къытэкIолIэгъагъ ыкIи МэщбэшIэ Исхьакъ ышъхьэкIэ нэIуасэ зэрэфэхъугъагъэр къытфиIотагъ. Апэрэу адыгэ литературэр зылъэгъугъэхэри, тхылъхэр зыщэфы зышIоигъохэри ахэтыгъэх, ау тэ тхылъхэр тщэхэрэп, тэухъу­мэх. Ахэр зэрашIогъэшIэгъонхэр гуапэ тщэхъу, — еIо Фатимэ.

Сыхьатым ипоэзие къыхиубытэрэ уахътэм Фатимэ шIу ылъэгъурэ усэу «Адыгэхэр» зыфиIоу МэщбэшIэ Исхьакъ ытхыгъэм къеджагъ.

Литературнэ зэIукIэм усэ тIокIым ехъу адыгабзэкIи урысыбзэкIи къыщеджагъэх, ахэр зэфэшъхьафыгъэх, ау зы лъапсэ яIагъ — шIулъэгъоу Адыгеим ичIыгу, ащ ицIыфхэм, яшэн-хабзэхэм афыряIэр.

Лъэпкъ тхылъеджапIэмрэ Адыгэ телевидениемрэ яIофышIэхэр, общественникхэр ыкIи адыгэ поэзиер зикIасэхэр ары нахьыбэрэмкIэ микрофоныр зыгъэфедагъэхэр. ШыкIэпщынэмрэ пхъэкIыч­хэмрэ амакъэ усэмэ акIэлъыгъ. Адыгэ къашъоу «УджымкIэ» зэхахьэр зэфашIы­жьыгъ.Александра Балабась.