КIэлэегъаджэхэмрэ кIэлэпIухэмрэ агъэшIуагъэх

Гъэсэныгъэм ылъэныкъокIэ IэпэIэсэныгъэу яIэр къызщагъэлъэгъогъэ республикэ ыкIи федеральнэ зэнэкъокъухэм ща­текIуагъэхэм Адыгеим и ЛIышъхьэу КъумпIыл Мурат тыгъуасэ дипломхэмрэ ахъщэ шIухьафтынхэмрэ аритыжьыгъэх. Джащ фэдэу кIэлэцIыкIу IыгъыпIэхэм яIофышIэхэм, гурыт сэнэхьат гъэсэныгъэ, гъэсэныгъэ тедзэ языгъэгъотыхэрэм, кIэлэегъаджэм ямафэхэм афэгъэхьыгъэ мэфэкI зэхахьэм хэлэжьагъ

Iофтхьабзэм ипэублэ республикэм и ЛIышъхьэ гъэхъэгъэшIу зышIыгъэ кIэлэегъаджэхэм ыкIи кIэлэпIухэм къафэгушIуагъ. Ягъэхъагъэхэм къащымыуцу­хэу, яшIэныгъэхэм ренэу зэрэхагъа­хъорэм, лъэныкъуакIэхэм зэралъыхъу­хэрэм яшIуагъэкIэ текIоныгъэхэр къызэрэдахыхэрэр къыхигъэщыгъ.

— Шъощ фэдэ IофышIэхэм яхьатыркIэ республикэм игъэсэныгъэ хэхъо­ныгъэхэр ешIых, къыткIэхъухьэрэ лIэ­ужхэр цIыф дэгъу хъунхэм, щыIэныгъэм чIыпIэ гъэнэфагъэ щагъотыным тызэ­гъусэу тыдэлажьэ. КIэлэегъаджэхэм тызэракъотыр зэхашIэн фае. ТиеджапIэхэм, кIэлэцIыкIу IыгъыпIэхэм ыкIи колледжхэм сэнаущыгъэ зыхэлъ, зиIоф­шIэн шIу зылъэгъурэ цIыфхэр къякIо­лIэнхэу тыфай. Нэбгырэ пэпчъ иIофшIэн зэрифэшъуашэу зэрэзэхищэщт амал­хэр иIэн фае. IэпыIэгъу тызэрафэ­хъурэ лъэныкъо пчъагъэ тиI, ахэм ащыщых ясэнаущыгъэ къызыщагъэлъагъорэ зэнэкъокъухэр. Ахэм яшIуагъэкIэ кIэлэегъэджэ сэнэхьатым мэхьанэу иIэм нахь хэхъо, зэнэкъокъухэм ахэлажьэ­хэрэр яшIэныгъэхэмкIэ зэхъожьых, — къыIуагъ АР-м и ЛIышъхьэ.

Гъэсэныгъэм епхыгъэ сэнэхьатхэм афэгъэхьыгъэ зэнэкъокъуи 7-мэ яшъо­лъыр уцугъохэр илъэс къэс республикэм щызэхащэх. Джащ фэдэу кIэлэегъэджэ анахь дэгъухэм ахъщэ шIухьафтынхэр афагъэшъуашэх, кIэлэегъэджэ ныбжьыкIэхэм апае «ЕджэпIакIэм — кIэлэ­егъэджакIэхэр» зыфиIорэр рагъэкIокIы.

Мы аужырэ илъэсхэм республикэм икIэлэегъаджэхэр зэнэкъокъум ифедеральнэ уцугъохэм ялауреат хъугъэх, хагъэунэфыкIырэ чIыпIэхэр къыдахыгъэх. Мы илъэсыми гъэхъэгъэшIухэр ашIыгъэх. Къэлэ гъэпсыкIэ зиIэ поселкэу Яблоновскэм дэт кIэлэцIыкIу Iыгъы­пIэу N 13-м икIэлэегъэджэ-психологэу Анна Цыганковар урысые зэнэкъокъум ихэушъхьафыкIыгъэ лъэныкъомкIэ ха­гъэунэфыкIырэ чIыпIэ къыщы­дихыгъ.

Селоу Красногвардейскэм дэт гимназиеу N 1-м физикэмкIэ икIэлэегъаджэу Роман Каракуловыр «Урысыем икIэлэегъэджэ анахь дэгъу» зыфиIорэ зэнэкъокъум хэлэжьагъ, хэушъхьафыкIыгъэ шIухьафтынэу цифрэ шIыкIэм тегъэпсыхьэгъэ лабораторие къыфа­гъэшъошагъ.

Джащ фэдэу Мыекъопэ медицинэ кол­леджым икIэлэегъаджэу, хэушъхьафы­кIыгъэ дзэ операцием иветеранэу ­Сергей Скрыльник анахь дэгъухэм ащыщ хъугъэ. Урысые зэнэкъокъоу «Илъэсым иIэпэIас» зыфиIорэм илъэныкъоу «Призванием» ихэушъхьафыкIыгъэ шIухьафтын ащ къы­фагъэшъошагъ ыкIи Ямало-Ненецкэ автоном шъолъырымкIэ хэушъхьафыкIыгъэ дзэ операцием иветеранхэм я Ассоциацие ишIу­хьафтын къыратыгъ.

Зэнэкъокъоу «Илъэсым иIэпэIас» зыфиIорэм ишъолъыр уцугъо хагъэунэфыкIырэ чIыпIэ къыщыдэзыхыгъэ Ирина Постарнаковар федеральнэ зэнэкъокъум икомиссие хагъэхьагъ.

— Ныбджэгъу лъапIэхэр! Шъуигъэ­хъагъэхэм Адыгеир арэгушхо. Ащ шъу­къыщымыуцуным ыкIи джыри хэхъо­ныгъэхэр шъушIынхэм мэхьанэшхо иI. Уахътэр ыпэкIэ лъэкIуатэ, дунаим зэ­хъокIыныгъэхэр фэхъух, арышъ, кIэлэ­егъаджэм ишIэныгъэхэм ренэу ахигъэ­хъон, лъэныкъуакIэхэр къыгъотынхэ, джырэ шапхъэхэм адиштэрэ шIыкIэхэр ыгъэфедэнхэ фае. Къыхэшъухыгъэ сэнэхьатым шъузэрэфэшъыпкъэмкIэ, гуфэбэныгъэу кIэлэцIыкIухэм апэжъу­гъохырэмкIэ, зэрифэшъуашэу къыткIэ­хъухьэрэ лIэужхэр зэрэшъупIухэ­рэмкIэ тышъуфэраз. ТекIоныгъэ къы­зэрэдэ­шъухыгъэм пае сыгу къыздеIэу сышъу­фэгушIо, — къыIуагъ КъумпIыл Мурат.

Нэужым республикэм и ЛIышъхьэ зэнэкъокъухэм текIоныгъэ ыкIи хагъэу­нэфыкIырэ чIыпIэ къыщыдэзыхыгъэхэм шIухьафтынхэр афигъэшъошагъэх.

«Адыгеим икIэлэегъэджэ анахь дэгъу» зыфиIорэ республикэ зэнэкъокъум текIоныгъэ къыщыдэзыхыгъэр псэупIэу Красногвардейскэм дэт гимназиеу N 1-м физикэмкIэ икIэлэегъаджэу Ро-ман Каракуловыр ары. Мы илъэсым «Адыгеим ипэщэ анахь дэгъу» зыфиIорэ щытхъуцIэр къэзылэжьыгъэр станицэу Дондуковскэм дэт гурыт еджапIэу N 9-м ипащэу Татьяна Шаповаловар ары. Адыгеим икIэлэпIу анахь дэгъу хъугъэр поселкэу Яблоновскэм дэт кIэлэцIыкIу IыгъыпIэу N 14-м икIэлэпIоу Бастэ Мир. КIэлэегъэджэ-дефектолог анахь дэгъур селоу Красногвардейскэм дэт кIэлэцIыкIу IыгъыпIэу N 4-м икIэлэегъэджэ-­логопедэу Татьяна Лактионовар ары. Адыгеим икIэлэегъэджэ-психолог анахь дэгъоу къыхагъэщыгъэр поселкэу Яблоновскэм дэт кIэлэцIыкIу IыгъыпIэу N 13-м икIэлэегъэджэ–психологэу Анна Цыганковар ары. «НыдэлъфыбзэмкIэ ыкIи литературэмкIэ кIэлэегъэджэ анахь дэгъу» зыфиIорэм щытекIуагъ Адыгэ­къалэ дэт гурыт еджапIэу N 4-м пэублэ классхэмкIэ икIэлэегъаджэу КIыкI Розэ, ныдэлъфыбзэмкIэ кIэлэпIу анахь дэгъу хъугъэр кIэлэцIыкIу IыгъыпIэу N 32-м икIэлэпIоу Кубэщыч Ларис. «Илъэсым иIэпэIасэ» хъугъэр Мыекъопэ медицинэ колледжым икIэлэегъаджэу Сергей Скрыльник. Гъэсэныгъэ тедзэмкIэ зэ­нэкъокъум анахь дэгъоу зыкъыщызыгъэ­лъэгъуагъэр кIэлэцIыкIу технопаркэу «Кванториумым» икIэлэегъаджэу Роман Ермолаевыр ары.