МэфэкI зэхахь

АР-м и ЛIышъхьэу КъумпIыл Мурат кIэлэегъаджэхэм, кIэлэпIухэм ыкIи гъэсакIо­хэм афэгушIуагъ.

Урысыем щыпсэурэ лъэпкъхэм языкIыныгъэ и Илъэсэу мыгъэ зэрэщытыр ипэублэ псалъэ къыщыхигъэщыгъ. Ар кIэлэегъаджэхэм яIофшIэн зэрепхыгъэр, мафэ къэс зыкIыныгъэм ахэр зэрэфэлажьэхэрэр къыIуагъ.

— Непэ хэушъхьафыкIыгъэ дзэ операцием щыIэхэу, тихэгъэгу къэзыу­хъумэхэрэр шъоры езгъэджагъэхэр. Ахэм лIыгъэшхо зэрахьэ. ХэушъхьафыкIыгъэ дзэ операцием щыIэгъэ кIэлэегъаджэхэу ветеран хъугъэхэр ары анахьэу къыхэбгъэщынхэ фаер. Ахэр непэрэ зэхахьэм хэлажьэх. Къиныгъохэм шъуа­пхырыкIи, къыткIэхъухьэрэ лIэужхэм шIэныгъэ яжъугъэгъотыным ыуж шъуи­хьажьыгъ. IэпэIэсэныгъэу шъуIэкIэлъыр, лIыгъэу шъухэлъыр кIэлэеджакIохэмкIэ щысэтехыпI. ТидзэкIолIхэм зэкIэми шъхьэкIафэ къатефэ. ТекIоныгъэр къызэрэдэтхыщтым тицыхьэ телъ, — къы­Iуагъ АР-м и ЛIышъхьэ.

Тихэгъэгу, тиреспубликэ зыфэдэщтыр кIэлэегъаджэхэм яIофшIэн зэрелъытыгъэр КъумпIыл Мурат къыхигъэщыгъ. Адыгеим икIэлэегъаджэхэм уарыгушхонэу зэрэщытыр, зисэнэхьат хэшIыкIышхо фызиIэ, сэнаущыгъэ ин зыхэлъ IофышIэхэр бэу республикэм зэрисхэр хигъэунэфыкIыгъ.

— ШъуиIофшIэн гухахъо хэжъугъотэным фэшI типшъэрылъхэр дгъэцэкIэщтых. Мы лъэныкъом щылажьэхэрэм, анахьэу ветеранхэм инэу тафэраз, — къыIуагъ АР-м и ЛIышъхьэ.

Нэужым КъумпIыл Мурат анахь къа­хэщыгъэ кIэлэегъаджэхэм къэралыгъо тынхэр аритыжьыгъ. «Адыгэ Республикэм иапшъэрэ еджапIэ изаслуженнэ IофышI» зыфиIорэр фагъэшъошагъ Адыгэ къэралыгъо университетым гуманитар шIэныгъэхэмкIэ ыкIи культурэмкIэ и Институт IэкIыб къэралыгъуабзэхэмкIэ икафедрэ идоцентэу Аулъэ Фатимэ.

«Адыгэ Республикэм гъэсэныгъэмкIэ изаслуженнэ IофышI» зыфиIорэ щыт­хъуцIэр афагъэшъошагъ Джэджэ районым игурыт еджапIэу N 1-м химиемкIэ икIэ­лэегъаджэу Ольга Абалонскаям, МКъТУ-м иполитехническэ колледж икIэлэегъаджэу Валентина Доронинам, Теуцожь районым гъэсэныгъэмкIэ и ГъэIорышIапIэ ипащэ иIэнатIэ зыгъэцэкIэрэ ЖакIэмыкъо Светланэ, Тэ­хъутэмыкъое районым икIэлэцIыкIу IыгъыпIэу N 12-м икIэлэпIоу Анастасия Пикула, Адыгэкъалэ дэт гурыт еджа­пIэу N 3-м ипащэ игуадзэу Лъэцэр Разиет.

Адыгэ Республикэм и ЛIышъхьэ ирэзэныгъэ тхылъхэр аратыгъэх псэупIэу Красногвардейскэм дэт кIэлэцIыкIу IыгъыпIэу N 6-м ипащэу Наталья Алейниковам, Шэуджэн районым ит гурыт еджапIэу N 4-м урысыбзэмкIэ ыкIи литературэмкIэ икIэлэегъаджэу Бгъошэ Чэбэхъан, Мыекъопэ районымкIэ кIэлэцIыкIу IыгъыпIэу N 2-м икIэлэпIу шъхьа­Iэу Людмила Жуковам, Мыекъопэ индустриальнэ техникумым икIэлэегъаджэу Къоджэшъэо Римэ, Кощхьэблэ районымкIэ кIэлэцIыкIу IыгъыпIэу N 14-м икIэлэпIу шъхьаIэу Евгения Кравченкэм, Мыекъуапэ дэт кIэлэцIыкIу IыгъыпIэу N 14-м икIэлэпIоу Шъхьэлэхъо Замрэт.

Нэужым АР-м и Къэралыгъо Совет — Хасэм и Тхьаматэу Владимир Нарожнэм гущыIэ ратыгъ. АР-м и Парламент идепутатхэм ацIэкIэ зисэнэхьат мэфэкI хэзыгъэунэфыкIыхэрэм ар къафэгу­шIуагъ, рэзэныгъэ тхылъхэр нэбгырэ заулэмэ аритыжьыгъ. Джащ фэдэу министрэу Евгений Лебедевыр гущыIэ фабэхэмкIэ къэзэрэугъоигъэхэм за­къыфигъэзагъ.

ДЕЛЭКЪО Анет.