М. Гордышов
Спорт мэфэкI Iофтхьэбзэ ин тыгъуасэ Мыекъуапэ щыкIуагъ. Апэрэу тиреспубликэ щызэхащагъ зэхэпхъэгъэ бэнэн лъэпкъхэмкIэ профессиональнэ турнирэу «Файт Найтс» зыфиIорэр.
Адыгеим и ЛIышъхьэу КъумпIыл Мурат «Файт Найтсым» ипрезидентэу Камил Гаджиевым, ММА-мкIэ Урысыем иныбжьыкIэ хэшыпыкIыгъэ командэ итренерэу Батмэн Юрэ аIукIагъ. Мы турнирым изэхэщэн, Адыгеим спортым хэхъоныгъэ щишIынымкIэ амалэу щыIэхэм ахэр атегущыIагъэх. ЗэдэгущыIэгъум хэлэжьагъэх компаниеу «Трестым» игенеральнэ пащэ иапэрэ гуадзэу Бырсыр Анзоррэ АР-м физическэ культурэмкIэ ыкIи спортымкIэ и Комитет итхьаматэу Дэгужъые Муратрэ.
— Адыгеим ибэнакIохэм, ибоксерхэм, нэмыкI классическэ спорт лъэпкъхэм ялIыкIохэм щытхъур къалэжьыгъ. Ау мыщ фэдэ турнирыр тэркIэ кIэ. ТикIалэхэмкIэ ыкIи типшъашъэхэмкIэ ММА-м испортсменхэр щысэтехыпIэх. Арышъ, ащ зэнэкъокъум изэхэщэн шIуагъэ къызэритыщтым щэч хэлъэп, — къыIуагъ республикэм ипащэ.
Компаниеу «Трестым» ишIуагъэкIэ турнирыр зэхащагъ. Мыщ республикэм щешIых шэпхъэшIухэм адиштэрэ псэупIэхэр, ащ епхыгъэ инфраструктурэр зэтырегъэпсыхьэ, Iэрыфэгъу къэлэ щыIакIэр гъэпсыгъэным иIахьышIу хэлъ. Джы шъолъырым игъусэу социальнэ проектхэри егъэцакIэх.