Адыгеир хэлажьэ

Урысые мэкъумэщ къэгъэлъэгъонэу «Дышъэ бжыхь-2026» зыфиIоу Москва щыкIорэм, хабзэ зэ-рэхъу­гъэу, Адыгеир хэлажьэ. Мы илъэсым ар чъэпыогъум и 7-м къыщегъэжьагъэу и 10-мнэс кIощт.

— ТиреспубликэкIэ мыщ фэдэ Iофтхьабзэхэм амал дэгъу къаты шъолъырым инвестициехэмкIэ иIоф­хэм язытет нэIуасэ фэшIыгъэнхэмкIэ, чIыгулэжьхэм ягъэхъагъэхэм ащыгъэгъозэгъэнхэмкIэ, гъомылап­хъэр щынэгъончъэнымкIэ зэшIохыгъэн фаехэм ягъэунэфынкIэ, зэдэлэжьэныгъэм ылъэныкъокIэ шIыкIэ-амалыкIэхэр къыхэхыгъэнхэмкIэ, хъызмэтым изехьанкIэ нэмыкI шъолъырхэм IофшIэкIэшIоу аIэ­кIэлъ хъугъэхэм ыкIи кIэу къыхахы­гъэхэм ащыгъэгъозэгъэнхэмкIэ, — ­къыхигъэщыгъ республикэм и ЛIышъхьэу КъумпIыл Мурат.

Урысые къэралыгъо мэкъумэщ университетэу К. А. Тимирязевым ыцIэкIэ щытым квадрат метрэ 88-рэ зэлъеубыты тикъэгъэлъэгъонэу къыщызэIуахы­гъэм. Республикэм инвестициехэмкIэ иIофхэм язытет, проектхэу гъэхъагъэ хэлъэу агъэцакIэхэрэм стендым нэIуасэ афешIых. Адыгеим икъэгъэлъэгъуапIэ лъэпкъ нэшанэ иIэу гъэпсыгъэ, тхыпхъэ­хэмкIэ ар гъэкIэрэкIагъ.Анахь чIыпIэшхо мыщ щызыубыты­хэрэр хэтэрыкIхэр, цумпэхэр, пхъэшъхьэ-­мышъхьэхэр, гъомылэпхъэшI ыкIи къыдэгъэкIыжьыным фэгъэзэгъэ предприятиехэм къащагъэхьазырыгъэ гъэщхэкIхэр, шъонхэр, тыгъэгъэзэ дагъэр, къое лъэпкъ зэфэшъхьафхэр ары.

— Республикэм зэрыгушхон икъун иI. ЧIыгулэжьхэм IэпыIэгъу зэрарагъэгъотырэ программэхэм яшIуагъэкIэ уахътэм диштэрэ лъэны­къуакIэхэр мэкъу-мэщым нахь игъэ­кIотыгъэу щыдгъэфедэхэ хъугъэ, унэгъо фермэхэм язэхэщэнкIи хэпшIыкIэу ыпэкIэ тылъыкIотагъ. Мэкъумэщым щылажьэхэрэр яIоф­шIэн кIэгъэгушIугъэнхэмкIэ Iоф­тхьэбзакIэхэр ренэу тэгъэфедэх — илъэсэу икIыгъэм сомэ миллион 850-рэ фэдиз ащ пэIудгъэхьагъ, мы илъэсми ащ къыщыдгъэкIэщтэп. Анахь шъхьаIэр ахэр ищыкIагъэу зэрэщытхэр ыкIи кIэухышIухэр ­зэрафэхъухэрэр ары, — аритхагъ КъумпIыл Мурат ихъытыу нэ­кIубгъохэм.