Iэшъынэ А.
2026-рэ илъэсым ибжыхьэ дзэ дэщыгъо фэгъэхьыгъэ пресс-зэIукIэ АР-м идзэ комиссариат тыгъуасэ ригъэкIокIыгъ. АР-м идзэ комиссар шъхьаIэу Александр Авериным ар зэрищагъ.
Iофтхьабзэм хэлэжьагъэх АР-м идзэ комиссариат цIыфхэр дэщыгъэнхэмкIэ ыкIи ухьазырыгъэнхэмкIэ отделым ипащэу Виталий Лебедевыр, идзэ врачебнэ комиссие итхьаматэу Игорь Буренковыр, районхэм ащыIэ дзэ комиссариатхэм ятхьаматэхэр, журналистхэр.
Пэублэм дзэ комиссар шъхьаIэм къызэрэхигъэщыгъэмкIэ, зэрэхабзэу, дзэ дэщыным Iоф дэзышIэрэ лъэныкъо пстэури ащ фэхьазырых. ЗэхъокIыныгъэу мыщ фэхъугъэхэм ащыщ къулыкъу зыхьыщтхэм якъеджэн джы илъэс псаум зэрэрекIокIырэр ыкIи ныбжьыкIэхэм якъыхэгъэщын епхыгъэ IофшIэныр цифрэ шъуашэм зэрэтехьагъэр, ащкIэ дзэ учетым и Реестрэ зэрагъэфедэрэрА. Авериным хигъэунэфыкIыгъ.
— ЗыныбжьыкIэ къулыкъур зыхьынэу къызтефэхэрэм якъеджэн джы илъэс псаум зэрэрекIокIырэм ишIуагъэкIэ дзэ комиссариатхэм IофшIэныр атемыгъэуагъэу, икъоу медицинэ ыкIи психологие уплъэкIунхэр зэрахьанхэ алъэкIы хъугъэ. Ащ емылъытыгъэу, дэщыгъохэм яедзыгъохэр зытетыгъэм фэдэу — гъатхэм ыкIи бжыхьэм — зэхэщэгъэщтых. 2026-рэ илъэс дзэ дэщыгъом республикэм щыщ нэбгырэ 3000-м ехъу къулыкъур ахьыным къыхеубытэ. ИлъэсымкIэ да-щын фаеу къытфагъэуцугъэ пшъэрылъыр пстэумкIи нэбгырэ 900-м ехъу. Гъэтхэ дзэ дэщыгъом къыхиубытэу нэбгырэ 500 фэдиз къулыкъум ащагъ, джащ фэдиз бжыхьэ дзэ дэщыгъом дэкIыщт. ПIалъэу къызэрэтыщтхэр ыкIи чIыпIэу зыдащэщтхэр зэблэхъугъэхэп, хэушъхьафыкIыгъэ дзэ операциер зыщыкIорэм ахэр ащэщтхэп, — хигъэунэфыкIыгъ Александр Авериным.
Къэбар жъугъэм иамалхэм къатыгъэ упчIэхэм яджэуапхэр А. Авериным ыкIи районхэм ащыIэ дзэ комиссариатхэм ятхьаматэхэм къатыжьыгъэх.
IЭШЪЫНЭ Сусан.