Н. Гусевар
Мыекъуапэ итыгъэкъокIыпIэ лъэныкъоу унэхэм яшIын игъэкIотыгъэу зыщыкIорэм апэрэ подстанциер щатIупщыгъ ыкIи сабыибэ зэрыс унагъохэм, хэушъхьафыкIыгъэ дзэ операцием щыIэхэм, фэгъэкIотэныгъэ зиIэ нэмыкI купхэм чIыгухэр къазыщаратыгъэм электроэнергиер нагъэсыгъ.
АР-м социальнэ-экономическэ хэхъоныгъэмкIэ ипрограммэ къыдыхэлъытагъэу 2022-рэ илъэсым электрорыкIопIэ километрэ 14,5-рэ ащ щагъэпсыгъагъ. Ау электроэнергием икъэкIопIэ шъхьаIэ ар пашIэшъущтыгъэп, сыда пIомэ ащ пае технологическэ Iофтхьабзэу зэшIохыгъэн фэягъэр лъэпIэдэдэу къыдэкIыщтыгъ.
АР-м и ЛIышъхьэ ыкIи министрэхэм я Кабинет яIэпыIэгъукIэ Iофыр зэшIохыгъэ хъугъэ. Мыбюджет къэкIуапIэхэр IофшIэным къыращэлIагъэх. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Кедр» зыфиIорэм мы чIыпIэм электроэнергиер къещэлIэгъэным ипроект ыгъэцэкIагъ.Ащ ишIуагъэкIэ чIыгу Iахь 600-м тет унэхэм электроэнергием икъэкIуапIэхэр къящэлIэгъэн амал подстанцием къытыщт. Джынэс псэолъэшIыныр жъажъэу мыщ щыкIощтыгъ, джы Iофхэм язытет нахьышIу хъущт. Унэ зышIы зышIоигъохэр ащ фигъэчэфыщтых.
Аэропортым ыIыгъыгъэ шъолъырэу сабыибэ зиIэхэм джы афагощыгъэми мыщ фэдэ IофшIэнхэр щэкIох. 2021-рэ илъэсым электроэнергием икъэкIопIэ километрэ 11, 55-рэ ащ щагъэпсыгъагъ. ПсэолъэшI компание купым пшъэрылъ зыфишIыжьыгъэу мы чIыпIэми электроэнергиер зытIупщыщт подстанциер щагъэпсыщт.
2027-рэ илъэсым иапэрэ мэзихым псэолъэшI-монтажнэ IофшIэнхэр аухынхэу агъэна-фэ. ФэгъэкIотэныгъэхэр зиIэхэу чIыгу Iахь 500-м ехъу зэратыгъэмэ электроэнергиер анэсыщт, джыри 350-рэ подстанцием пашIэшъущт. IофшIэнхэр лъэкIуатэх.