Теннис цIыкIумкIэ зэнэкъокъоу Мыекъуапэ щызэхащагъэм мы спорт лъэпкъыр зыгу рихьырэ нэбгырэ 80-м ехъу зэрищэлIагъ.
Iофтхьабзэм кIэщакIо фэхъугъэх Мыекъуапэ и НыбжьыкIэ гупчэ, республикэм икъэлэ шъхьаIэ физическэ культурэмкIэ ыкIи спортымкIэ и Комитет, «Мыекъопэ НыбжьыкIэр» зыфиIорэм ныбжьыкIэ IофхэмкIэ иотдел.
Зэнэкъокъур спорт комплексэу «Ошъутенэм» щыкIуагъ. ТекIоныгъэм ыкIи хагъэунэфыкIырэ чIыпIэ-хэм афэбэнагъэх Мыекъуапэ, Апшеронскэ, Псыфабэ, Лабинскэ, Лэбапэ, Хъыдыжъ ыкIи Коренов-скэ яспортсменхэр, зэкIэмкIи нэбгырэ 82-рэ. Ахэм ащыщэу 69-р — хъулъфыгъэх, 13-р — бзылъфыгъэх.
Турнирыр сыхьатищрэ кIуагъэ. Апэрэ уцугъом купхэмкIэ гощыгъэхэу спортсменхэр зэнэкъокъугъэх, ахэм анахь лъэшхэр кIэух едзыгъом щызэIукIагъэх. Хъулъфыгъэ финалым ихьагъэх Александр Воронцовымрэ Дмитрий Гончаровымрэ (тIури Мыекъуапэ щыщых). Воронцовым 3:1-у текIоныгъэр къыдихыгъ ыкIи чемпион хъугъэ. Адыгеим икъэлэ шъхьаIэ щыпсэурэ Чэтэо Хьасан джэрз медаль фагъэшъошагъ. Бзылъфыгъэхэм язэнэкъокъу икIэух едзыгъо щызэIукIагъэх Апшеронскэ испортсменкэу Екатерина Скрипниковамрэ Мыекъуапэ щыщ Людмила Шумскаямрэ. ПартиитIум язэфэхьысыжьхэмкIэ Людмилэ 2:0-у текIощтыгъ, ау Скрипниковам иешIакIэ ригъэхъугъ ыкIи 3:2-у текIоныгъэр къыдихыгъ. Ящэнэрэ чIыпIэр ыубытыгъ къуаджэу Хьатикъуае щыпсэурэ Надежда Трофимовам.
Пэрытныгъэр зыубытыгъэхэм ыкIи хагъэунэфыкIырэ чIыпIэхэр къыдэзыхыгъэхэм щытхъу тхылъхэр, медальхэр ыкIи шIухьафтынхэр афагъэшъошагъэх.