Программэу «Адыгеим и ЛIыхъужъхэр» зыфиIорэм игъэцэкIэн зиIахьышIу хэзылъхьагъэхэр мы мафэхэм Мыекъопэ къэралыгъо технологическэ университетым щагъэшIуагъэх.
Адыгэ Республикэм и Мафэ ипэгъокIэу мэфэкI Iофтхьабзэу апшъэрэ еджапIэм щыкIуагъэм сэнэхьат ухьазырыныгъэм ишъолъыр программэу «Къэралыгъо ыкIи муниципальнэ гъэIорышIэныр. Адыгеим и ЛIыхъужъхэр» зыфиIорэм зиIахьышIу хэзылъхьагъэхэр Адыгэ Республикэм и Къэралыгъо Совет — Хасэм ирэзэныгъэ тхылъхэмкIэ къыхагъэщыгъэх. Нэбгырэ 30 фэдиз агъэшIуагъ, ахэм ахэтыгъэх Адыгэ къэралыгъо университетыр, лъэпкъ хъызмэтымкIэ ыкIи къэралыгъо къулыкъумкIэ Урысые Федерацием и Президент дэжь щыIэ Урысые академиер ыкIи ащ епхыгъэ Къыблэ-Урысые институтым игъэIорышIапIэ.
Зэхэт IофшIэнэу агъэцэкIагъэм программэр къыкIэлъыкIуагъ. Ащ апшъэрэ еджапIэхэм ыкIи федеральнэ кураторхэм анэмыкIэу хэбзэ къулыкъухэм ялIыкIохэр, министерствэхэм, муниципальнэ ыкIи общественнэ организациехэм Iоф ащызышIэхэрэр хэлэжьагъэх. Ахэр спикерхэу ыкIи экспертхэу Iофтхьабзэм къырагъэблэгъагъэх, яIэпэIэсэныгъэкIэ, яшIэныгъэхэмкIэ зэхъожьыгъэх. Сыд фэдэрэ лъэныкъокIи IэпыIэгъу къызэрафэхъурэмкIэ АР-м иминистрэхэм я Кабинет хэтхэм зэрафэразэхэр Iофтхьабзэм къыщаIуагъ.
Программэм игъэцэкIэнкIэ зиIахьышIу къэкIуагъэхэм ащыщ АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу, хэушъхьафыкIыгъэ дзэ операцием иветеранхэм я Ассоциацие ипащэу Цэй Эдуард.
Программэм икуратор лъэпкъ хъызмэтымкIэ ыкIи къэралыгъо къулыкъумкIэ Урысые Федерацием и Президент дэжь щыIэ Урысые академиер.
— ШIуагъэ къэзытырэ егъэджэнхэр зэрэзэхэтщагъэхэм имызакъоу, ежь программэм хэлажьэхэрэми агу рихьыгъ. Джы пшъэрылъ шъхьаIэу тиIэр апшъэрэ еджапIэр къэзыухыхэрэм зэрагъэгъотыгъэ шIэныгъэхэр агъэфедэжьын амал яIэныр ары. РеспубликэмкIэ «Адыгеим и ЛIыхъужъхэм» бэкIэ ащэгугъых, — къыIуагъ Мыекъопэ къэралыгъо технологическэ университетым муниципальнэ къулыкъушIэхэм яIэпэIэсэныгъэ хэгъэхъогъэнымкIэ ишъолъыр Гупчэ ипащэу Пафэ Фатимэ.