Пшъэрылъ гъэнэфагъэ зиIэ Гупчэр

1998-рэ илъэсым чъэпыогъум терроризмэм ищынагъо хэгъэгум къышъхьарыуцогъагъ. Ау псынкIэу ащ пэуцугъэх: хэгъэгум щынэгъончъэнымкIэ и Федеральнэ къулыкъу ипащэу Владимир Путиным (джы Урысыем и Президент) хэушъхьафыкIыгъэ пшъэрылъ зыгъэцэкIэщт Гупчэ зэхэщэгъэным фэгъэхьыгъэ унашъом ыIапэ кIидзэжьыгъагъ.

Гупчэм хэтыгъэх зэлъашIэхэрэ «Аль­фэмрэ» «Вымпелымрэ». Ащ нэс ахэм пшъэрылъэу яIагъэхэр лъэшэу зэтекIыщтыгъэх: «Альфэм» транспортымрэ псэолъэ инхэмрэ ащаубытыгъэхэр (шэсы хъугъэхэр) шъхьафит ышIыжьыщтыгъэх, «Вымпелым» IэкIыб къэралхэм лъы­хъон-диверсионнэ IофшIэныр ащигъэцакIэщтыгъ, нэужым, я 1990-рэ илъэсхэм, тыкъэзыуцухьэрэ дунаим зэрарышхо езыхын зылъэкIыщт псэуалъэхэр къыухъумэщтыгъэх. Ахэр зэрэзэхагъэ­хьажьыгъэхэм мэхьанэшхо иIагъ, сыда пIомэ IофшIэкIэшIоу аIэкIэлъымкIэ зэрэзэхъожьыщтхэм имызакъоу, зы кIочIэ лъэш хъунхэм иамал щыIэ хъугъагъэ.

Гупчэм Iоф зишIэгъэ илъэсхэм шэсы хъугъэ нэбгыри 100 пчъагъэ шъхьафит ышIыжьыгъ, уIэшыгъэ хъункIакIохэм, бзэджашIэхэм япащэхэу Салман Радуевыр, Арби Бараевыр, Аслан Масхадовыр, Раппани Халиловыр, Анзор Астемировыр, Саид Бурятскэр ыкIи «Аль-Каидэ» иэмиссархэр къыубытыгъэх. Ащ фэдэ пшъэрылъ къинхэр зэшIопхынхэм пае къулайныгъэ уиIэкIэ икъунэу щытыгъэп, хэушъхьафыкIыгъэ ухьазырыныгъэ дэгъу ищыкIэгъагъ.

Ащ фэдэ Гупчэм къулыкъу щыпхьынэу ухэфэныр къин дэдэу щытыгъ, пхъашэу къыхахыщтыгъэх. Ыпкъышъол дэгъоу зэрэпсыхьагъэм имызакъоу, IэпэIэсэныгъэ иIэн фэягъ, моральнэ-психологическэ шэпхъэшIухэм адимыштэмэ хъунэу щытыгъэп. Ахэм ухьазырыныгъэ дэгъу ягъэгъотыгъэным илъэс пчъагъэ ыхьэуи къыхэкIыщтыгъ. Къушъхьэлъэ чIыпIэхэм, ошъогум, псым защагъасэщтыгъ, щэрыонымкIи ухьазырыныгъэ дэгъу арагъэгъо­тыщтыгъ, къухьэлъатэхэм, мэшIокухэм, псэуалъэхэм узэращызекIон фаем зафагъасэщтыгъ. Сыд фэдэрэ чIыпIэ къин ифагъэхэми, хэкIыпIэ къызэрагъотын алъэкIыщт амалхэр аушэтыщтыгъэх, теубытагъэ ахэлъэу зекIощтыгъэх.

Урысыем щынэгъончъэнымкIэ и Федеральнэ къулыкъу испецназ къызфагъэ­федэ анахь бзэджэшIэ щынагъохэр къаубытынхэ зыхъукIэ, сыда пIомэ нахьыбэрэмкIэ ахэр уIэшыгъэу къапэуцужьых. Гупчэм бэ къызфигъэфедэнэу иIэр: бронированнэ техникэр, цIыф зэрымысэу быбырэ пкъыгъохэр, джырэ уахътэм диштэрэ Iашэр ыкIи нэмыкIхэр. Ау ахэм Iофэу зэшIуахырэм изытет къэзыушыхьатырэр пчъагъэхэр ыкIи техникэр арэп, цIыфхэм яцыхьэ ахэм зэрателъыр ары пстэуми анахь осэ тэрэзыр. Гупчэм иIофышIэхэр анахь пшъэрылъ къинхэм афагъазэх, хэукъоныгъэ хэпшIыхьэ зыщымыхъущт, ар лъапIэу къыпфекIун зыщилъэкIыщт лъэ­хъаным.