Гриппым пэуцужьырэ вакцинэм ихэлъхьан епхыгъэ урысые Iофтхьабзэр Iоныгъом рагъэжьагъ. Ар етIупщыгъэу Адыгеим щылъэкIуатэ.
Мы мафэхэм депутатхэм, министрэхэм, комитетхэм япащэхэм, къулыкъу зэфэшъхьафхэм яIофышIэхэм вакцинэхэу «Флю-М» ыкIи «Совигрипп» зыфиIохэрэр зыхарагъэлъхьагъ.
Апэу вакцинэр зыхязгъэлъхьагъэр АР-м псауныгъэр къэухъумэгъэнымкIэ иминистрэу Мэрэтыкъо Рустем. Гриппым пэуцужьырэ вакцинэр республикэм щыпсэухэрэм игъом зыхарагъэлъхьаным, вирусхэм къахэкIырэ уз хьылъэхэм ежьхэри, ягупсэхэри щаухъумэнхэм ар къыфэджагъ.
— Гриппыр псынкIэу зэпахырэ ыкIи зызыушъомбгъурэ узхэм ащыщ. ГухэкI нахь мышIэми, бэхэм мыр уз къызэрыкIоу алъытэ, ау уз хьылъэхэр хэзыхыхэрэри, зидунай зыхъожьыхэрэри къахэкIых. Непэ УФ-м псауныгъэр къэухъумэгъэнымкIэ и Министерствэ сымэджэгъу лъэхъаным къекIокIырэ штаммхэм апэуцужьын зылъэкIыщт вакцинэхэр къегъэхьазырых, ахэр щынэгъончъэх. Арышъ, республикэм щыпсэухэрэм зафэсэгъазэ прививкэр зыхарагъэлъхьанэу, — хигъэунэфыкIыгъ Мэрэтыкъо Рустем.
Министрэм къызэриIуагъэмкIэ, мы илъэсым гриппым пэуцужьырэ вакцинэр Адыгеим щыпсэурэ нэбгырэ мин 220-мэ ахалъхьанэу агъэнэфагъ, ахэм ащыщэу мин 46-р — кIэлэцIыкIух.Гриппыр къыомыутэкIынымкIэ вакцинэхэм яшIогъэшхо къэкIо. Джыри узым изыушъомбгъун римыгъажьэзэ, вакцинэр зыхябгъэлъхьанымкIэ мы уахътэр амалышIоу щыт. Вакцинэм цIыфым ииммунитет ыгъэпытэщт, ащ ишIуагъэ къэмыкIощтмэ, зэрар къыхьыщтэп. ЗипсауныгъэкIэ щынагъо зышъхьарыт купым хахьэхэрэм апэу мыр зыхарагъэлъхьан фае.
Тишъолъыр иIэзапIэхэм шъхьадж зыщыпсэурэ чIыпIэм елъытыгъэу IофшIэгъу мафэхэм прививкэр зыщахарагъэлъхьан алъэкIыщт.
IЭШЪЫНЭ Сусан.