Чъэпыогъу мазэу къытфихьагъэр бжыхьэм ыгузэгу. Сыд фэдэщта мы мазэр?
«Чъэпыогъум мафэм блэгъогогъо зызэблехъу» аIо цIыфхэм. АдыгеимкIэ чъэпыогъур дышъэ бжыхьэ шъыпкъ. Илъэс къэс мы мазэм ыгузэгухэм адэжь хэпшIыкIэу къэучъыIы. Апэрэ мэфэ чъыIэхэм ауж тхьамаф-тхьамэфитIу пIалъэкIэ фабэм къегъэзэжьы — «бабье лето» зыфаIорэ мафэхэр къехьэх. Джащыгъум фабэр градус 24-м ехъун ылъэкIыщт. Мыщ фэдэ лъэхъаным температурэр градус 36,7-м нэсыгъэу агъэунэфыгъагъ 1998-рэ илъэсым. Чъэпыогъу анахь чъыIэр зыщыIагъэр 1946-рэ илъэсыр ары — чъыIэр градус 13,8-м нэсыгъагъ.
ГидрометеорологиемкIэ ыкIи тыкъэзыуцухьэрэ дунаим изытет иуплъэкIункIэ Гупчэм къызэритыгъэмкIэ, чъэпыогъум фабэу щыIэщтыр шапхъэхэм ашIокIыщтэп, ощхыр мэзэ шапхъэхэм афэдизыщт, ашIокIыни ылъэкIыщт. Мазэм иапэрэ мафэхэм фэбэщт, ятIонэрэ мэзэныкъом — ощхым жьыбгъэ чъыIэ хэтэу. Къушъхьэлъэ чIыпIэхэм ос цIынэ къащесын ылъэкIыщт. Чъэпыогъум иящэнэрэ мэфипшIым къэучъыIыщт, ощхыхэр щыIэщтых, къыгъэщтыщт. Нэужым тхьамаф-тхьамэфитIу пIалъэкIэ фабэм, «бабье лето» зыфаIорэм, къыгъэзэщт.
Мазэм иапэрэ мэфипшIым чэщым фабэу градуси 7 — 12 щыIэщт, мафэм — 15 — 20, градус 22 — 24-м зыщынэсырэ мафэхэри къыхэкIыщтых.
ЯтIонэрэ мэфипшIым — чэщым градуси 5 — 10, градус 1 — 6 нахь зыщымыIэщт чэщхэри къыхэфэщтых, мафэм градуси 10 — 15 щыIэщт.
Ящэнэрэ мэфипшIым чэщым фабэу щыIэщтыр градуси 4 — 9, мафэм градус 12 — 17 щыIэщт, къушъхьэлъэ чIыпIэхэм чъыIэр градуси 3 — 5, мазэм ыкIэхэм адэжь чъыIэр градуси 5 — 10-м ащынэсыщт.
Лъэшэу къызыщещхырэ мафэхэм псыхъохэм адэт псым зыкъыIэтын ылъэкIыщт. Губгъохэм Iоф ащыпшIэн умылъэкIыным ищынагъо щыIэщтэп.
КIАРЭ Фатим.