ФутболымкIэ Адыгэ Республикэм и Къэралыгъо Совет — Хасэм ишIухьафтын зэрылъ Кубокым икъыдэхын икIэух едзыгъо стадионэу «Зэкъошныгъэм» щыкIуагъ.
Финалым щызэIукIагъэх турнирым икомандэ анахь лъэшитIоу «Урожаимрэ» «Адыгэкъалэрэ». ЕшIэгъур гъэшIэгъонэу, узIэпищэу кIуагъэ, командитIури текIоныгъэм фэбэнагъэх, къэлапчъэм Iэгоуибгъу дадзагъ.
ЗэIукIэгъум ия 4-рэ такъикъ пчъагъэр къызэIуихыгъ «Адыгэкъалэ» щешIэрэ Тхьаркъохъо Джантемыр. Я 8-рэ такъикъым Михаил Текнеджян пенальтикIэ къэлапчъэм Iэгуаор дидзагъ — 1:1 хъугъэ. Ащ ыуж Дмитрий Межрецкэр къахэщыгъ, ащ зэкIэлъыкIоу IэгоуитIу дидзагъ ыкIи 3:1-у «Урожаир» ыпэ ишъыгъ. Ау «Адыгэкъалэ» ифутболистхэр къызэкIэкIуагъэхэп Хьаткъо Аслъанрэ Хьатит Алыйрэ пчъа-гъэр 3:3 ашIыгъ. Ау ащ ыуж къэлапчъэм Iэгуаор дэзыдзагъэхэр «Урожаим» хэтхэр ары, ахэм 6:3-у текIоныгъэр къыдахыгъ.
АР-м и Къэралыгъо Совет — Хасэм гъэсэныгъэмкIэ, ныбжьыкIэ IофхэмкIэ ыкIи спортымкIэ икомитет итхьаматэу Шэуджэн Тембот текIоныгъэр къыдэзыхыгъэ Мыекъопэ районым икомандэ фэгушIуагъ, къылэжьыгъэ Кубокыр ритыжьыгъ.
ЗэхэщакIохэм ешIэкIо анахь дэгъухэр къыхагъэщыгъэх: къэлэпчъэIут анахь дэгъур — Валерий Картамышевыр («Урожаир»), ухъумэкIо анахь дэгъур — Хьаткъо Аслъан («Адыгэкъал»), гузэгум щешIэгъэ футболист анахь дэгъур — Устэкъо Азмэт («Адыгэкъал»), ыпэкIэ щешIэрэ футболист анахь дэгъур — Эльдар Ширяевыр («Урожаир»), къэлапчъэм анахьыбэу Iэгуаор дэзыдзагъэр — Дмитрий Межрецкэр («Урожай», гъогогъу 11-рэ), туриниыр иешIэкIо анахь дэгъур — Юрий Волчановскэр («Урожаир»).