СамбэмкIэ дунаим ипервенствэу Грецием икъалэу Солоники щыкIуагъэм къэралыгъо 40-мэ яспортсмен анахь лъэшхэр хэлэжьагъэх, зэкIэмкIи нэбгырэ 250-рэ.
Ахэм ахэтыгъэхэ Адыгэ Республикэм илIыкIуитIумэ дышъэ медальхэр къахьыгъэх. Тэхъутэмыкъое районым ибэнакIоу Цэй Алый килограмм 58-м нэс къэзыщэчыхэрэм якуп зыщиушэтыгъ. ТикIалэ ухьазырыныгъэ дэгъоу иIэм ишIуагъэкIэ гумэкIыгъо къыхэмыкIэу кIэух едзыгъом нэсын ылъэкIыгъ ыкIи ащ щыIукIагъ Армением илIыкIоу Нарек Симонян. Алый нахь лъэшэу къычIэкIыгъ ыкIи къытефэу дышъэ медаль къыфагъэшъошагъ. Ар зыгъасэрэр Джарымэкъо Рустам.
Теуцожь районым щыщ ЦIыкIу Аскэри кIэух едзыгъом дэгъу дэдэу зыкъыщигъэлъэгъуагъ. Килограмм 79-м нэс къэзыщэчыхэрэм якуп зыщызыушэтыгъэ тиспортсмен Кыргызстан къэзыгъэлъэгъогъэ Данил Авраменкэм финалым щыIукIагъ. ЦIыкIур хэпшIыкIэу нахь лъэшыгъ ыкIи дунаим ичемпион хъугъэ. Ащ итренерыр Хьабэхъу Адам.
Гъэхъэгъэшхо зышIыгъэ тибэнакIохэм афэгушIуагъ Адыгэ Республикэм и ЛIышъхьэу КъумпIыл Мурат. Ахэм ятекIоныгъэхэм республикэр зэрарыгушхорэр ыкIи ахэм ягъэхъагъэхэр спортым хэхъоныгъэ ышIыным шъолъырым мэхьанэшхо зэрэщыратырэм ишыхьатэу зэрэщытыр ащ хигъэунэфыкIыгъ.
— Алыйрэ Аскэррэ дышъэ медальхэр къызэрахьыгъэмкIэ сафэгушIо! ТекIоныгъакIэхэм афэкIонхэу, лъэгэпIэ инхэм анэсынхэу афэсэIо, — къыхигъэщыгъ республикэм ипащэ.
