ИгъэкIотыгъэу хагъэунэфыкIыгъ

Адыгэ Республикэм и Мафэ Мыекъуапэ имэфэкIи дыхагъэунэфыкIыгъ. Ащ къыдыхэлъытагъэу Iофтхьэбзэ зэфэшъхьафхэр зыгъэпсэфыгъо мафэхэм зэхащэгъагъэх.

Ермэлыкъэу рагъэкIокIыгъэм цIыфыбэ къекIолIагъ. СатыушI 250-мэ къыдагъэкIырэ гъомылэпхъэ зэфэшъхьафхэр ащ къырахьылIагъэх. Лым, гъэщым, пхъэшъхьэ-мышъхьэхэм ыкIи хэтэрыкIхэм ауасэ бэдзэрым щыIэм нахь мэкIагъ. Муниципальнэ творческэ купхэм якъэгъэлъэгъонхэр ермэлыкъым пэблагъэу зэхэщэгъагъэх. МэфэкI зэнэкъокъухэм текIоныгъэ къащыдэзыхыгъэхэм шIухьафтынхэр аратыгъэх.

«Мэздахэ изекIо гъогу» шIоигъоныгъэ зиIэхэр рагъэкIуагъэх. МэфэкIым ехъу­лIэу Мыекъуаэ щыпсэухэрэм ыкIи ихьакIэхэм апае ар зэхащэгъагъ. Проек­тэу «Мые» зыфиIорэм хэтэу ар рекIо­кIыгъ. Мэздахэ идэкIояпIэ тетхэу Нэгыежъ Iуашъхьэм дэкIоягъэх Ейскэ, Киров ыкIи нэмыкI чIыпIэхэм къарыкIыгъэ нэбгырэ 40. ДэкIояпIэм Нарт эпосым къыхэхыгъэ сурэтэу тетхэр зекIохэм къаплъыхьа­гъэх, адыгэ шэн-хабзэхэм ыкIи лъэпкъ культурэм нэIуасэ зафа­шIыгъ. ЗыплъыхьэпIэ чIыпIэу Iуашъхьэм тетхэм сурэтхэр зыщатырахыгъэх. Мые­къуапэ итамыгъэу пхъэм хэшIыкIыгъэ мые цIыкIухэр шIухьафтынэу хьакIэхэм аратыгъ.

Республикэ ипподромым шыгъэчъэ фестиваль щыкIуагъ. Искусствэм ыкIи культурэм иIэпэIасэхэм концерт къыща­тыгъ. Адыгэ шы лъэпкъышIухэр ащ хэлэжьагъэх. Адыгеим, Чэчэным, Ставрополь ыкIи Краснодар крайхэм, Ростов, Белгород, Волгоград хэкухэм къарыкIыгъэ шыузе­кIохэр ыкIи шыхэр зыхъухэрэр шыгъачъэм къекIолIагъэх. АР-м и ЛIышъхьэ, Къэралыгъо Советым — Хасэм, министрэхэм я Кабинет ыкIи УФ-м IофшIэнымкIэ и ЛIыхъужъэу, Адыгеим, Къэ­бэртэе-Бэлкъарым, Къэрэщэе-Щэр­джэсым, Абхъазым ялъэпкъ тхакIоу МэщбэшIэ Исхьакъ ишIэжь ыцIэкIэ агъэ­нэфэгъэ шIухьафтынхэр шыгъачъэм илъыгъэх. Шыухэр блэгъогогъо къызэдэчъагъэх.

— Шыгъачъэр зэхэзыщагъэхэм ыкIи хэлэжьагъэхэм, хьакIэу къекIолIагъэхэм, культурнэ программэ гъэшIэгъон зыгъэхьазырыгъэхэм лъэшэу сафэраз. Шы лъэпкъышIухэм яхъун Адыгеим ижъырэ зэманхэм къащегъэ­жьагъэу щыпылъых, а Iофыр мыкIодынэу, лъыдгъэкIотэнэу тыфай ыкIи тыдэлажьэ. Мыщ фэдэ Iофтхьабзэхэм язэхэщэн адыгэмэ якультурнэ кIэн, яшэн-хабзэхэр къэухъумэ­гъэнхэмкIэ ишIогъэшхо къэкIо, — къыщитхыгъ ихъытыу нэкIубгъо АР-м и ЛIышъхьэу КъумпIыл Мурат.

«Мыекъопэ ныбжьыкIэр» зыфиIорэ интерактивнэ пчэгум ныбжьыкIэхэр, патриотическэ ыкIи культурнэ зэха­хьэхэм ялIыкIохэр зыфищагъэх. Сурэт­шIы­нымкIэ мастер-классхэр, Адыгеим илъ шэн-хабзэхэм ыкIи икультурэ афэгъэхьыгъэ зэнэкъокъухэр зэхэщэгъагъэх. ТекIоныгъэ къыдэзыхыгъэхэм шIухьафтынхэр аратыгъэх. НыбжьыкIэ проект зэфэшъхьафхэм якъэгъэлъэгъони рагъэ­кIокIыгъ. «Майкопские новости» зыфи­Iорэ гъэзетэм иредакцие проект хьа­лэмэткIэ мэфэкIым хэлэжьагъ. ХьакIэхэр сурэттехынымкIэ зэнэкъокъум хагъэлэжьагъэх, Мыекъуапэ имэфэкIкIэ зэрафэхъохъухэрэр хьакIэхэм къарагъэ­Iуагъ, гъэзетэм ихъытыу нэкIубгъо ахэр къырагъэхьагъэх. ЯчаныгъэкIэ анахьэу къахэщыгъэхэм мыIэрысэхэр, гъэзет къыдэкIыгъакIэхэр аратыгъэх.

Дзэ-патриотическэ зэхахьэхэм, мыса­тыу организациехэм джэгукIэхэр, творческэ къэгъэлъэгъонхэр зэхащэгъагъэх. «Нысхъэпэ къэбархэм яун» зыфиIорэ къэгъэлъэгъоныр гъэшIэгъоныгъ. «Шварц и Унэ» зэлъашIэрэ тхакIом ищыIэныгъэ гъогу, итворчествэ афэгъэхьыгъэ лекциехэр щыкIуагъэх.Адыгеим иныбжьыкIэхэм, Апэрэхэм я Движение хэтхэм нэгум сурэт те­шIыхьанымкIэ, Урысыем щыпсэурэ цIыф лъэпкъхэм языкIыныгъэ и Илъэс диштэу лъэпкъ тхыпхъэхэр зытет бгъэхалъхьэхэр шIыгъэнхэмкIэ мастер-классхэр ныбжьыкIэхэм апае зэхащэгъагъэх, интерактивнэ пчэгухэм Iоф ашIагъ.

Мыекъуапэ гъэсэныгъэмкIэ икомитет, IэпэIасэхэм, къэлэ тхылъеджапIэхэм якъэгъэлъэгъонхэр культурэм иунэу «Гигантым» ыпашъхьэ щыкIуагъэх. «Адыгея в фотообъективе» зыфиIорэм республикэм ичIыопс идэхагъэ къизыIотыкIырэ сурэт техыгъэхэр бэу хэтыгъэх.

Лениным ипчэгу лъэпкъ зэкъошныгъэм фэгъэхьыгъэ къэгъэлъэгъон щыкIуагъ. КъашъомкIэ театрэу «Премьера» зыфиIоу Владикавказ къикIыгъэмрэ лъэпкъ къашъом иансамблэу «Иван- да- Марья» зыцIэмрэ концерт къызэдатыгъ.

Къэгъэлъэгъон шъхьаIэу пчыхьэм зэхащагъэм цIыфыбэ зэрищэлIагъ. УФ-м ыкIи Абхъазым язаслуженнэ ыкIи Адыгеим инароднэ артисткэу Нэхэе Тамарэ, лъэпкъ орэдымкIэ ыкIи къашъомкIэ АР-м и Къэралыгъо ансамблэу «Ислъамыер», лъэпкъ къашъомкIэ Къэралыгъо академическэ ансамблэу «Налмэсыр», Гупчэу «Ошъадым» хахьэхэу лъэпкъ къашъомкIэ ансамблэу «Синдикэр», орэдыIохэу Дэр Абир, Хъурэнэ Азэ, нэмыкIхэри мэфэкI концертым хэлэжьагъэх. Адыгеим ыкIи Мыекъуапэ ямафэхэр дахэу хагъэунэфыкIыгъэх.