АР-м гъэсэныгъэмрэ шIэныгъэмрэкIэ и Министерств.
«Урысыем икIэлэегъэджэ анахь дэгъу» зыфиIорэ зэнэкъокъум иаужырэ уцугъоу Белгородскэ шъолъырым щыкIуагъэм Красногвардейскэм дэт гурыт еджапIэу N 1-м физикэмкIэ икIэлэегъаджэу Роман Каракуловыр хэлэжьагъ ыкIи хэушъхьафыкIыгъэ шIухьафтын къыфагъэшъошагъ.
ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Робиклаб» зыфиIорэм ихэушъхьафыкIыгъэ номинациекIэ цифровой лабораторие къыратыгъ.
Мыр шIухьафтын къызэрыкIоп, Роман Игорь ыкъом иIофшIэн инновационнэ екIолIакIэр зэригъэфедэрэм, иегъэджэн сыхьатхэр нахь гъэшIэгъон зэришIыщтым зэрэпылъым уасэ къазэрафашIырэр къыгъэлъэгъуагъ. Цифрэ лабораториеу къыфагъэшъошагъэм иIофшIэнкIэ лъэшэу къышъхьэпэщт. Ащ ишIуагъэкIэ кIэлэеджакIохэм джырэ шапхъэхэм адиштэрэ ушэтынхэр аригъэшIыщтых, физикэм епхыгъэ лъэныкъохэр зэрагъэшIэнымкIэ нэрылъэгъу афэхъущт, ашIырэ ушэтынхэр зэхафыжьынхэ алъэкIыщт. Формулэхэр ау сыдми зэрамыгъашIэхэу, ушэтын гъэшIэгъон афэхъухэзэ нахь гъэшIэгъонэу алъыIэсыщтых.
Шъугу къэдгъэкIыжьын Роман Каракуловыр зэнэкъокъум имуниципальнэ ыкIи ишъолъыр уцугъохэм анахь дэгъоу зыкъызэращигъэлъэгъуагъэр. Предмет къиныр кIэлэеджакIохэм ашIогъэшIэгъон зэришIырэ ыкIи гурыIогъошIоу къызэрафиIуатэрэр зэнэкъокъум къыщигъэлъэгъуагъ. Иегъэджэн сыхьатхэм ушэтын IофшIэнхэр, джырэ технологиехэр бэу ащ егъэфедэх. Джащ фэдэу проектнэ ыкIи джэгукIэ шIыкIэхэр, практическэ IофшIэн зэфэшъхьафхэр къыхехых.
2025-рэ илъэсым къыщегъэжьагъэу Урысые зэнэкъокъоу «Урысыем икIэлэегъэджэ анахь дэгъур» лъэпкъ проектэу «НыбжьыкIэхэр ыкIи кIэлэцIыкIухэр» зыфиIорэм хэхьэ.