Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэрэ хэгъэгу кIоцI IофхэмкIэ Министерствэм щынэгъончъэнымкIэ икъулыкъурэ яIофышIэхэм Урысыем хэгъэгу кIоцI IофхэмкIэ и Министерствэ Тэхъутэмыкъое районымкIэ иотдел иIофышIэу къуалъхьэ зыштагъэм игъогупэ пабзыкIыгъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ иIофышIэхэм оперативнэ-лъыхъон Iофтхьабзэу зэрахьагъэхэм якIэуххэр IэубытыпIэ къызыфишIызэ, Урысые Федерацием и Уголовнэ кодекс ия 291.2-рэ статья иа 1-рэ Iахь диштэу Урысыем и Следственнэ комитет Адыгэ РеспубликэмкIэ иследственнэ гъэIорышIапIэ полицием иIофышIэ уголовнэ Iоф къыфызэIуихыгъ.Гъогум техъухьэгъэ тхьамыкIагъор зэхафы, ащкIэ лажьэ зиIэр агъэунэфы зэхъум, полицием иIофышIэу къуалъхьэ къаIызыхыгъэм къэбар нэпцIхэр документым ритхагъэу къыхагъэщыгъ.БзэджэшIагъэм лъапсэ фэхъугъэхэм ягъэунэфын тегъэпсыхьэгъэ следственнэ Iофтхьабзэхэр джыдэдэм зэрахьэх.
Терроризмэм пэшIуекIогъэныр
Урысыем щынэгъончъэнымкIэ и Федеральнэ къулыкъу и Культурнэ гупчэ сериябэ хъурэ художественнэ фильмэу «Спецы» зыфиIорэм ипремьерэ щыкIуагъ.
«Спецы» зыфиIорэ фильмыр Урысыем и ФСБ терроризмэм пэшIуекIорэ Iофтхьабзэу зэшIуихыхэрэм афэгъэхьыгъ. Хэгъэгум ишъолъыр зэфэшъхьафхэм къащыхъугъагъэхэр ары ащ лъапсэ фэхъугъэхэр.Анахь Iоф къинхэм афэгъэзэгъэ подразделениехэр зыхэхьэхэрэ Гупчэ хэушъхьафыкIыгъэм иIофшIэн зыфэдэр игъэкIотыгъэу ащ къегъэлъагъо.
Серие пэпчъ терроризмэм илъэныкъо горэм икъыхэгъэщынрэ игъэунэфынрэ афэгъэхьыгъ. КъэбарыкIэхэм къахимыубытагъэхэр, цIыфхэр игъэкIотыгъэу зыщымыгъозэ лъэныкъо зэфэшъхьафхэр, бзэджэшIэ купхэр зэрэзэпхыгъэхэр ыкIи нэмыкIыбэхэр нэгум къыкIэуцох.Темыр Кавказым бзэджэшIэ купхэм зэрэщябэныхэрэм, анахьэу «Имарат Кавказ» зыфиIорэ организациеу Урысыем щамыдэрэм 2007 — 2015-рэ илъэсхэм зэрихьэгъэ бзэджэшIагъэхэм язэхэфын зэрэкIуагъэр, джащ фэдэу Къырым, ДНР-м, нэмыкI чIыпIэхэм Iофтхьабзэу ащызэшIуахыгъэхэр фильмым къызэлъеубытых.
2026-рэ илъсым чъэпыогъум и 18-м фильмэу «Спецы» зыфиIорэм телеканалэу РЕН ТВ-мкIэ шъуеплъын шъулъэкIыщт.
Сомэ мини 150-рэ тазырэу тыралъхьагъ
Муниципальнэ образованиеу «Афыпсыпэ къоджэ псэупIэм» ипащэу ШIуцIэ Казбек къыпаIэтыгъэ IофымкIэ Тэхъутэмыкъое район хьыкумым кIэух унашъор ыштагъ. Урысыем и Уголовнэ кодекс ия 159-рэ статья ия 3-рэ Iахь зигугъу къышIырэ бзэджэшIагъэ зэрихьагъэкIэ ар агъэмысагъ.
Нафэ къызэрэхъугъэмкIэ, 2020-рэ илъэсым чъэпыогъум и 1-м водитель ыштагъэ фэдэу К. А. ШIуцIэм тхылъ нэпцIхэр зэхигъэуцогъагъэх.2020-рэ илъэсым чъэпыогъум и 1-м къыщегъэжьагъэу 2026-рэ илъэсым мэзаем и 1-м нэс сомэ миллион 1,2-рэ лэжьапкIэу водителым фагъэкIуагъ. Ахъщэр ащ К. А. ШIуцIэм ритыжьыщтыгъ, адрэм зэрэфаеу ар къызфигъэфедэщтыгъ. Пащэм сомэ миллион 1,2-рэ хъурэ чIэнагъэ къоджэ псэупIэм ригъэшIыгъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ зэхищэгъэ уплъэкIунхэм якIэуххэр IэубытыпIэ къызыфишIыхэзэ, Урысыем и Следственнэ комитет Адыгэ РеспубликэмкIэ иследственнэ гъэIорышIапIэ уголовнэ Iофыр къызэIуихыгъ ыкIи зэхифыгъ.Урысыем и Уголовнэ кодекс ия 159-рэ статья ия 3-рэ Iахь диштэу Тэхъутэмыкъое район хьыкумым К. А. ШIуцIэм сомэ мини 150-рэ тазырэу тырилъхьагъ, чIыпIэ зыгъэIорышIэжьынымкIэ къулыкъухэм илъэскIэ IэнатIэ ащиIыгъын фимытэу ыгъэнэфагъ.
КIэух унашъо ыштагъ
Адыгэкъалэ щыщ илъэс 48-рэ зыныбжь ХъутIыжъ Иринэ иуголовнэ IофкIэ Теуцожь район хьыкумым кIэух унашъор ыштагъ. Урысыем и Уголовнэ кодекс ия 159.2-рэ статья ия 3-рэ Iахь зигугъу къышIырэ бзэджэшIагъэр зэрихьагъэкIэ (ахъщэшхо гъэпцIагъэкIэ къызIэкIигъэхьагъэкIэ) ар агъэмысагъ.Дэеу зэрэзэхихырэр, ящэнэрэ купым хэхьэрэ сэкъатныгъэ зэриIэр къэзыушыхьатырэ документ нэпцIхэр И. А. ХъутIыжъым Урысые Федерацием пенсиехэмкIэ ыкIи социальнэ страхованиемкIэ и Фонд Адыгэ РеспубликэмкIэ икъутамэ IэкIигъэхьагъэх. Сомэ мин 600 фэдиз хъурэ страховой пенсиер бзылъфыгъэм исчет рагъэхьанымкIэ ахэр лъапсэ хъугъэх.Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ зэхищэгъэ уплъэкIунхэм якIэуххэм атетэу уголовнэ Iофыр къызэIуихыгъ ыкIи зэхифыгъ Адыгэ Республикэм хэгъэгу кIоцI IофхэмкIэ и Министерствэ.
Теуцожь район хьыкумым бзэджэшIагъэ зезыхьэгъэ И. А. ХъутIыжъым сомэ мини 120-рэ тазырэу тырилъхьагъ. Адыгэ Республикэм и Прокуратурэ идаоу сомэ мин 600-м ехъурэ чIэнагъэу Урысые Федерацием пенсиехэмкIэ ыкIи социальнэ страхованиемкIэ и Фонд Адыгэ РеспубликэмкIэ икъутамэ ышIыгъэр И. А. ХъутIыжъым къыIыхыжьыгъэным фэгъэхьыгъэр зэшIохыгъэ хъугъэ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ипресс-къулыкъу