Хэбзэнчъэу наркотикхэр зыгъэзекIохэрэм ябэныгъэнымкIэ отделым иIофышIэхэм ащ фэдэ бзэджэшIагъэ зезыхьэрэ хъулъфыгъэ Тэхъутэмыкъое районым къыщаубытыгъ.
Оперативникхэм къызэратыгъэмкIэ, наркокурьерым муниципалитетым ипсэупIэхэм ащыщ бгъэфедэ мыхъущт веществор щигъэбылъынышъ, нэужым Интернетыр къызфигъэфедэзэ IуигъэкIын гухэлъ иIагъ. ЧIыпIэу къыздэкIуагъэм полицием иIофышIэхэр ащ къыщежэщтыгъэх.
Хъулъфыгъэр къызалъыхъум, наркотикэу узэгуцэфэрэ порошок фыжь зэкIоцIыщыхьагъэу 45-рэ къыхахыгъ. АР-м иэксперт-криминалистическэ Гупчэ иIофышIэхэм уплъэкIунэу ашIыгъэхэм къызэрагъэлъэгъуагъэмкIэ, ар «метилэфедрон» зыфаIорэ наркотик грамм 45-рэ хъущтыгъ.
Латиноамериканскэ къэралыгъохэм ащыщ къикIыгъэ хъулъфыгъэу илъэс 33-рэ зыныбжьыр зекIо фэдэу Урысыем къэкIуагъ, ау чIыпIэ дахэхэр зэримыгъэлъэгъухэу наркотик IуигъэкIыным ыуж ихьагъ.Полицием ирайон отдел УФ-м и Уголовнэ кодекс ия 228.1-рэ статья ия 3-рэ Iахь ыкIи ия 30-рэ статья ия 3-рэ Iахь адиштэу ащ уголовнэ Iоф къыфызэIуихыгъ. IэкIыбым къикIыгъэ хъулъфыгъэр аубытыгъ, гъусэхэр иIэмэ зэрагъашIэ.