АР-м и ЛIышъхьэ нэкIубгъу
Физкультурэм зыщыпылъынхэ ыкIи псауныгъэр зыщапсыхьан алъэкIыщт чIыпIакIэ Кощхьаблэ къыщызэIуахыгъ. Къуаджэхэм хахъо ягъэшIыгъэным тегъэпсыхьэгъэ программэм къыдыхэлъытагъэу ар ашIыгъ.
Квадрат метрэ мини 6-м баскетбол, волейбол, теннис цIыкIу ыкIи бадминтон зыщешIэнхэ алъэкIыщт ыкIи зыгъэпсэфыпIэ чIыпIэхэр къыхеубытэх. Джащ фэдэу кIэлэцIыкIухэм апае хьэшъо лъэгу зиIэ щынэгъончъэ джэгупIэ чIыпIэхэр, тIысыпIэхэр, хъэренэхэр, лъэсрыкIуапIэхэр щыгъэпсыгъэх. ЧIыпIэр щагу остыгъэхэм зэлъагъэнэфы, видеолъыплъэн пкъыгъохэм Iоф щашIэ, чъыгхэр, кондэ зэфэшъхьафхэр щыгъэтIысхьагъэх. Къэнагъэр архитектурнэ пкъыгъо мыинхэу чэщырэ къэнэфыщтхэр агъэуцужьынхэр ары.
— Къуаджэхэм хахъо ягъэшIыгъэным тегъэпсыхьэгъэ программэм ихьатыркIэ аужырэ илъэсхэм районым спорт чIыпIэхэр щыгъэпсыгъэнхэмкIэ амалыбэ ыгъотыгъ: къутырэу Казенно-Кужорскэм спорт унэ щыдгъэуцугъ, Вольнэмрэ Еджэркъуаерэ физкультурэм зыщыпылъынхэ ыкIи псауныгъэр зыщапсыхьан алъэкIыщт псэуалъэхэр яIэ хъугъэ, атлетикэ онтэгъумкIэ унэ Кощхьаблэ щэлажьэ. Адыгеим щыпсэухэрэм спорт псэуалъэхэр нахь апэблагъэ шIыгъэнымкIэ ыкIи ныбжь зэфэшъхьаф зиIэхэр физическэ культурэм пыщэгъэнхэмкIэ Iофэу тшIэрэм а пстэур иIахь, — къащиIуагъ АР-м и ЛIышъхьэ хъытыу нэкIубгъохэм.