А. Балабась
Мыекъуапэ дзэ дэщынымкIэ и Комиссие мы мафэхэм зэхэсыгъо иIагъ.
Ащ хэлэжьагъэх Мыекъопэ къэлэ администрацием ипащэу Геннадий Митрофановыр, дзэ комиссарэу Алексей Санташовыр, гъэсэныгъэмкIэ, псауныгъэм икъэухъумэнкIэ ыкIи хэбзэухъумэкIо къулыкъухэм ялIыкIохэр, нэмыкIхэр.
Гъэтхэ дзэ дэщыгъор зэрэкIуагъэр, апшъэрэ классхэм арыс кIэлэеджакIохэр дзэ къулыкъум зыщыфагъэхьазырхэрэ егъэджэн Iофтхьабзэхэм язэхэщэн, бжыхьэ дзэ дэщыгъом епхыгъэ Iофхэр ары анахьэу зытегущыIагъэхэр. Алексей Санташовым къызэриIуагъэмкIэ, гъэтхэ дзэ дэщыгъор хэ-бзэгъэуцугъэм диштэу кIуагъэ, гумэкIыгъо къыхэкIыгъэп.
Дзэ зэфэшъхьафхэм къулыкъу ащахьынэу нэбгыри 130-рэ дащыгъ. Анахьыбэр, нэбгырэ 83-р, Къыблэ дзэ шъолъырым ащагъ, адрэхэм Московскэ, Ленинградскэ дзэ шъолъырхэм, ракетнэ, космическэ, ошъогу-десант дзэхэм, Лъэпкъ гвардием къулыкъу ащахьыщт.
Мыекъуапэ дзэ дэщынымкIэ и Комиссие мы илъэсым нэбгырэ 1000 фэдиз къыращэлIэнэу агъэнэфэгъагъ. Ахэм ащыщэу 90-р зыщатхыгъэхэм зэращымыпсэухэрэм къыхэкIэу е нэмыкI ушъхьагъухэр иIэу повесткэхэр аIэкIагъэхьанхэ алъэкIыгъэп. Комиссием къекIолIагъэхэм ащыщэу нэбгырэ 410-р япсауныгъэ изытет ыпкъ къикIыкIэ дзэм къулыкъу щахьын амылъэкIыщтэу агъэунэфыгъ, нэбгырэ 460-р охътэ гъэнэфагъэкIэ къызэкIагъэкIожьыгъ, нахь кIасэу къулыкъум дащыщтых.Дзэ комиссарыр егъэджэн Iофтхьабзэхэм язэхэщэн къытегущыIэзэ, Iофыгъоу зэрихьылIагъэхэр нахь къыхигъэщыгъэх. ЖъоныгъокIэ мазэм ахэр зэхащэгъагъэх. Мыгъэ я 9 — 11-рэ классхэм арыс кIэлэеджэкIо 466-рэ а егъэджэнхэм къахиубытагъ, 430-р ахэлэжьагъ. Ау ахэм зэкIэми дзэ полигоным щыкIогъэ егъэджэнхэр акIунхэу хъугъэп. Транспортыр икъоу зэрэщымыIагъэр ары ушъхьагъу шъхьаIэу дзэ комиссарым къыхигъэщыгъэр, нэ-мыкI пэрыохъухэри яIагъэх.
Нэужым бжыхьэ дзэ дэщыгъом, къэкIощт илъэсым егъэджэнхэр зэхэщагъэ зэрэхъущтхэм япхыгъэ Iофыгъохэм атегущыIагъэх.
ХЪУТ Нэфсэт.