Чъэпыогъум и 3 — 5-м зэхащэщтых

Адыгэ Республикэм ыкIи Мыекъуапэ ямафэхэм яхэгъэунэфыкIын къыды­хэлъытэгъэ спорт Iофтхьабзэхэр чъэпыогъум и 3-м къыщегъэжьагъэу и 5-м нэс рагъэкIокIыщтых.

Шъолъырым щыпсэухэрэм ыкIи ихьакIэхэм футбол ешIэгъухэр, теннис цIыкIумкIэ зэнэ­къокъухэр, шыгъачъэ ыкIи псауныгъэр зыгъэпытэрэ марафоныр къяжэх.

Анахь дэгъуитфымэ ахэфэным фэбэнэщт

ФутболымкIэ Урысыем ипервенствэ иятIо­нэрэ лигэ хэт Мыекъопэ «Зэкъошныгъэр» къалэу Избербаш къэзыгъэлъэгъорэ «Неф­тяникым» дешIэщт. ЗэIукIэгъур республикэм икъэлэ шъхьаIэ щыкIощт. Апэрэ чIыпIитфыр зыIыгъхэм ахэфэным фэшI тикомандэ мы ешIэгъур къыхьын фае. Сыда пIомэ, зэнэкъо­къур аухынкIэ туритф ныIэп къэнагъэр. Зэ­IукIэгъур мафэм сыхьатыр 4-м рагъэжьэщт.

Командэхэр зыдэщыт чIыпIэхэр ыкIи очко пчъагъэу рагъэкъугъэр:

1. «Севастополь» — 56
2. «Шахтер» — 50
3. «Ростов-2» — 47
4. «Победа» — 42
5. «Рубин Ялта» — 37
6. «Нарт» — 34
7. «Кызылташ» — 34
8. «Зэкъошныгъ» — 33
9. «Спартак-Налщык» — 31
10. «Заря» — 30
11. «Астрахань» — 24
12. «Нефтяник» — 23
13. «Чайка-М» — 17
14. «Динамо-2» — 17
15. «Ангушт» — 16Чъэпыогъум и 4-р.Теннис цIыкIур ыкIи марафонырМы мафэм пчэдыжьым спорт комплексэу «Ошъутенэм» теннис цIыкIумкIэ зэнэкъокъу щыкIощт. Зыныбжь илъэс 16-м нэсыгъэхэм къащегъэжьагъэу мыщ хэлэжьэнхэ алъэ­кIыщт.Iофтхьабзэм зыщызыушэты зышIоигъохэм ятхын сыхьатыр 12-м рагъэжьэщт. Ащ икIэщакIох Мыекъуапэ и НыбжьыкIэ гупчэ, республикэм икъэлэ шъхьаIэ физическэ культурэмкIэ ыкIи спортымкIэ и Комитет ыкIи волонтер корпусэу «Майкоп Молодой» зыфиIорэр.Мы мэфэ дэдэм лъэс зекIонымкIэ Iоф­тхьабзэу «140000-здоровье Адыгеи» зыфи­Iорэм хэлажьэ зышIоигъохэм ятхын аухыщт. Мыр 2020-рэ илъэсым къыщегъэжьагъэу рагъэкIокIы. ЗэхэщакIохэм мыгъэ пшъэры­лъэу къагъэуцугъэмкIэ зызыушэты зышIоигъохэм тхьамафэм лъэбэкъу мини 140-рэ къакIун фае. Марафоныр чъэпыогъум и 5-м рагъэжьэщт.Чъэпыогъум и 5-р.МэфэкI мэфэ шъхьаIэрРеспубликэм и Мафэ фэгъэхьыгъэ шыгъа­чъэм шъуеплъынэу ащ изэхэщакIохэм шъурагъэблагъэ. Iофтхьабзэр республикэ ипподромым щыкIощт. АР-м и Къэралыгъо Совет — Хасэм, министрэхэм я Кабинет, Адыгеим физическэ культурэмкIэ ыкIи спортымкIэ и Комитет яшIухьафтынхэр зэрылъ къызэдэ­чъэнхэр программэм къыдыхэлъытагъэх.МэфэкI шыгъачъэм илъэныкъо шъхьаIэу щытыщт Адыгеим и ЛIышъхьэ ишIухьафтын зэрылъыр. Мыщ шы 17 хэлэжьэнэу агъэнафэ, гъогууанэр метрэ 2400-рэ, шIухьафтын фондыр сомэ миллиони 2.ФутболымкIэ зэнэкъокъуСпорт мэфэкIым зэфэхьысыжь фэхъущт футболымкIэ АР-м и Къэралыгъо Совет — Хасэм ишIухьафтын зэрылъ Кубокым икъыдэхынкIэ кIэух едзыгъор. Мыщ щызэIукIэщтых командэхэу «Адыгэкъалэрэ» «Урожаимрэ» (Мыекъопэ район). ЕшIэгъур республикэ стадионэу «Зэкъошныгъэм» щыкIощт, пэшIорыгъэшъэу сыхьатыр 4-м.БзэшIу Асхьад.