АР-м и Къэралыгъо Совет — Хасэм идепутатэу хадзыгъэхэр мы мафэхэм Адыгеим хэдзынхэмкIэ и Гупчэ комиссие щатхыгъэх.
Iоныгъом и 18 — 20-м щыIэгъэ хэдзынхэр зэрэкIуагъэхэр къызэфихьысыжьыгъ Гупчэ комиссием и Тхьаматэу Сэмэгу Нурбый. Ахэм процент 79,37-рэ (нэбгырэ мин 267-рэ фэдиз) ахэлэжьагъ.— Хэдзынхэм цIыфыбэ къызэрякIолIагъэм джыри зэ къыушыхьатыгъ обществэм граждан пшъэдэкIыжь ин зэриIэр. Республикэм ихэдзын кампание итарихъ пштэмэ, хэбзэгъэуцугъэр аукъуагъэу, дэо тхылъ къытфагъэхьыгъэу къыхэкIыгъэп, ащ урыгушхон фае, — къыIуагъ Сэмэгу Нурбый.
Хэдзынхэм лъыплъэкIо нэбгырэ мин 1,1-м ехъу ахэлэжьагъ. Ахэр АР-м и Общественнэ палатэ ыкIи политическэ партие зэфэшъхьафхэм яшъолъыр къутамэхэм ялIыкIох.
АР-м и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец шъолъырым ипащэ ыцIэкIэ депутатэу хэдзыгъэхэм къафэгушIуагъ. Урысыем и Президентэу Владимир Путиным цIыфхэр зэрэкъотхэр, зыкIыныгъэ зэрахэлъыр «Единэ Россиер» хэгъэгумкIэ ыкIи шъолъырымкIэ политическэ кIочIэ инэу зэрэщытыр хэдзынхэм джыри зэ къызэрагъэлъэгъуагъэр къыIуагъ.
ДепутатыкIэхэм ахэхьагъэх хэушъхьафыкIыгъэ дзэ операцием иветеранхэу Алексей Самоквитовымрэ Юрий Барковымрэ.
Хэбзэгъэуцугъэм диштэу хэдзынхэр зэрэкIуагъэхэр къаIуагъ Адыгеим и Общественнэ палатэ итхьаматэу Устэ Руслъанрэ цIыфхэм яфитыныгъэхэр къэухъумэгъэнхэмкIэ Уполномоченнэу Адыгеим щыIэ Михаил Шебанецрэ. Следственнэ изоляторым ыкIи бзэджэшIагъэ зезыхьагъэхэр зыщагъэпщынэхэрэ учреждениехэм ачIэсхэми амакъэ атын зэралъэкIыгъэр къыхагъэщыгъ.Граждан обществэм хэхъоныгъэ ышIынымкIэ ыкIи цIыфхэм яфитыныгъэхэр къэухъумэгъэнхэмкIэ УФ-м и Президент дэжь щызэхащэгъэ IофшIэкIо купым и Совет иэкспертэу Ольга Демичевам хэдзынхэр республикэм зэрэщыкIуагъэхэм осэ ин къызэрэфишIыгъэр Iофтхьабзэм къыщаIуагъ. Ежь ышъхьэкIэ ар Мыекъуапэ, Джэджэ ыкIи Мыекъопэ районхэм ащыIагъ, хэдзынхэр зыщыкIогъэ чIыпIэ 50-м ехъу къыкIухьагъ.
Нэужым депутатэу хадзыгъэхэм удостоверениехэр аратыжьыгъэх, мы кампанием изэхэщэн чанэу хэлэжьагъэхэм щытхъу тхылъхэр афагъэшъошагъэх.
ДЕЛЭКЪО Анет.