Тинахьыжъхэр тэгъэлъапIэх

Зыныбжь хэкIотагъэхэм я Дунэе мафэ тыгъуасэ хагъэунэфыкIыгъ. МэфэкIым къыдыхэлъытагъэу тинахьыжъ лъапIэхэу республикэм щыпсэухэрэм афэгушIуагъэх.

АР-м иминистрэхэм я Кабинет и Тхьаматэ игуадзэу — финансхэмкIэ министрэу Виктор Орловыр ыкIи IофшIэнымрэ социальнэ хэхъоныгъэмрэкIэ министрэу Мырзэ Джанбэч Мыекъуапэ щыпсэурэ илъэси 102-рэ зыныбжь Пелагея Фитьмовам иунэ еблэгъагъэх.

— Адыгэ Республикэм и ЛIышъхьэу КъумпIыл Мурат ыцIэкIи, сэ сшъхьэкIи зыныбжь хэкIотагъэхэм ямафэкIэ тыпфэгушIо. Псауныгъэ пытэ уиIэу, уигупсэхэр уашъхьагъ итхэу джыри илъэсыбэ къэбгъэшIэнэу тыпфэлъаIо, — къыIуагъ Виктор Орловым.

Мырзэ Джанбэч къызэрэхигъэщыгъэм­кIэ, мы мафэм ихэгъэунэфыкIын имурадыр ныбжь зиIэ цIыфхэм ягумэкIыгъо­хэм обществэм ынаIэ тыридзэныр, шъхьэзакъоу псэушъунхэм фытегъэпсы­хьэгъэнхэр ыкIи ахэм зэрифэшъуашэу алъыплъэгъэнхэр ары.

— Непэ тинахьыжъхэм шъхьэкIэфэныгъэ зыщафэтшIырэ маф. Хабзэм икъулыкъушIэхэм язакъоп, зэкIэми нахьыжъ зиIэхэм ахэр ащыгъупшэхэ хъущтэп. ЛIышъхьэу КъумпIыл Мурат пшъэрылъэу къытфишIыгъэм диштэу, тинахьыжъ лъапIэхэм зэрифэшъуашэу тынаIэ атетэгъэты, яфэIо-фашIэхэр афэтэгъэцакIэ. Ащ фэгъэхьыгъэ къэралыгъо программэхэр республикэм щыпхыращых: «Нахьыжъхэр», «Унагъор», «ГъэшIэ кIыхьэр». ЛIэшIэгъум ехъу къэзыгъэшIагъэхэм къакIугъэ гъогу кIыхьэр, зэдэIужь унагъохэр агъэпсын зэралъэкIыгъэр къыткIэхъухьэхэрэмкIэ щысэтехыпIэу щыт. Непэрэ мафэм ехъу­лIэу зыныбжь илъэси 100-м нэсыгъэу ыкIи ехъугъэу нэбгырэ 20 Адыгеим ис, — хигъэунэфыкIыгъ Мырзэ Джанбэч.

Пелагея Фитьмовар 1924-рэ илъэсым  гъэтхапэм и 5-м Ставропольем къыщыхъугъ. Я 30-рэ илъэсхэм япэублэ яунагъокIэ Краснодар краим къэкощыжьхи, Кощхьэблэ районым ипоселкэу Дружбэр псэупIэкIэ къыхахыгъ. Ащ дэжьым Пелагея илъэс 12 ныIэп ыныбжьыгъэр. Класситф къыухыгъэу ны-тыхэм IэпыIэгъу зэрящыкIагъэм фэшI губгъо­лэжь бригадэм хэхьэгъагъ. Нэужым заор къежьи, ятэ апэрэхэм ахэтэу дэкIы­гъагъ. Хэгъэгу зэошхом илъэхъан Пелагея Михаил ыпхъур Шъачэ идзэ госпиталь санитаркэу Iутыгъ, окопхэр зытIыхэрэм акIыгъугъ. Зэо ужым Мыекъуапэ Iоф щишIагъ, Адыгеим иэлектростанцие анахь инэу ГЭС-м ишIын хэлэжьагъ. ЩытхъуцIэу «IофшIэным иветеран» зыфиIорэр къыфагъэшъошагъ.

Ишъхьэгъусэу Николай Хэгъэгу зэошхом хэлэжьагъ. Илъэс 50 къызэдагъэ­шIагъэу идунай ыхъожьыгъ. Япшъашъэу Еленэ зэдапIугъ, ащ пхъуитIу къыфэ­хъугъ — Даринэрэ Суандэрэ.— Сигуапэ непэ шъхьэкIафэ къысэшъухызэ садэжь шъукъызэреблэгъагъэр, ащ сыгу къеIэты. Тэщ фэдэу ныбжь зиIэхэм ящыкIагъэр бэп, къыткIэхъу­хьэхэрэм, къытпэблагъэхэм янэплъэгъу фабэ зэхатшIэмэ кIуачIэ къытхелъхьэ. Сыныбжь емылъытыгъэу сипсауныгъи уигъэрэзэнэу щыт, сиIахьыл гупсэхэм сафэраз. Джыри илъэсыбэ къэзгъэшIэнэу зысэгъэхьазыры, — гушIозэ къыIуагъ Пелагея Фитьмовам.

Мы мэфэкIым къыдыхэлъытагъэу тинахьыжъ лъапIэхэу республикэм щыпсэухэрэм афэгушIуагъэх. Нэпэеплъ шIухьафтынхэр, къэгъагъэхэр, ЛIышъхьэм игущыIэ фабэхэр зэрытхагъэхэр афахьыгъэх.

IЭШЪЫНЭ Сусан.