Спорт ориентированиемкIэ Адыгэ Республикэм изэIухыгъэ чемпионатрэ ипервенствэрэ Мыекъуапэ щырагъэкIокIыгъэх. Тишъолъыр имызакъоу, Краснодар краим икъалэхэм, Санкт-Петербург ыкIи Пятигорскэ ялIыкIохэр Iофтхьабзэм хэлэжьагъэх. МэфитIум къыкIоцI спортсмен 300-м ехъумэ заушэтыгъ.
Лъэныкъохэу «классикэр» ыкIи «спринтыр» зыфиIохэрэмкIэ къэзэрэугъоигъэхэр зэнэкъокъугъэх. Ахэм ягъогууанэ къэлэ гупчэ паркым ыкIи зыгъэпсэфыпIэ чIыпIэу «Мэздахэ» апхырыкIыгъ, республикэ стадионэу «Зэкъошныгъэм» щаухыгъ.
Iофтхьабзэм спортымкIэ мастеритIу хэлэжьагъ. Ахэм ащыщ илъэс 74-рэ зыныбжь Галина Бабагян. Краснодар къэзыгъэлъэгъогъэ бзылъфыгъэм ыныбжь емылъытыгъэу лъэныкъоу «кросс-класикэм» ящэнэрэ чIыпIэр къыщыдихыгъ. Пятигорскэ къикIыгъэ Виталий Заборскэри спортымкIэ мастер, ар хъулъфыгъэхэм язэнэкъокъу анахь щылъэшыгъ. ПсэупIэу Абдзэхэхьаблэ щыщ Андрей Полуночевыр ятIонэрэ хъугъэ. Бзылъфыгъэхэм азыфагу пэрытныгъэр щиубытыгъ къалэу Геленджик испортсменкэу Анастасия Миловановам. ЯтIонэрэ ыкIи ящэнэрэ чIыпIэхэр аубытыгъэх республикэм икъэлэ шъхьаIэ илIыкIохэу Марина Погореловамрэ Виктория Купинамрэ.
Аныбжь елъытыгъэу хъулъфыгъэхэр ыкIи бзылъфыгъэхэр купиеу гощыгъагъэх. Ащ пэпчъ текIоныгъэр ыкIи хагъэунэфыкIырэ чIыпIэхэр къыдэзыхыгъэхэр зэхэщакIохэм къыхагъэщыгъэх.