Социальнэ ыкIи IофшIэн зэфыщытыкIэхэмкIэ АР-м илъэныкъуищ Комиссие тыгъуасэ зэхэсыгъо иIагъ. Iофтхьабзэр зэрищагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.
IофшIэпIэ чIыпIэхэр къэзытыхэрэм ащылажьэхэу унагъо зиIэхэм, хэушъхьафыкIыгъэ дзэ операцием иветеранхэм ыкIи зыныбжь илъэс 50-м шIокIыгъэхэм IэпыIэгъу аратыным фэшI Iофтхьабзэу зэшIуахын фаехэм ягъэнэфэнкIэ социальнэ ыкIи IофшIэн зэфыщытыкIэхэмкIэ УФ-м илъэныкъуищ Комиссие игъоу ылъэгъухэрэр гъэцэкIагъэ зэрэхъухэрэм, социальнэ зэдэлэжьэныгъэм исистемэ ыкIи профсоюзхэм ядвижение къалэу Мыекъуапэ зызэрэщаушъомбгъурэм, АР-м псауныгъэр къэухъумэгъэнымкIэ и Министерствэрэ медицинэм иIофышIэхэм УФ-мкIэ япрофсоюзрэ зэзэгъыныгъэу зэдашIыгъэм къыщыдэлъытагъэхэм япхырыщын ар афэгъэхьыгъагъ.Повесткэм щагъэнэфагъэхэм атегущыIэнхэр рамыгъажьэзэ республикэ зэнэкъокъоу «IофшIэным икъэухъумэнкIэ организацие анахь дэгъу» зыфиIорэм текIоныгъэр къыщыдэзыхыгъэхэм ар къэзыушыхьатырэ тхылъхэр Мырзэ Джанбэч аритыжьыгъэх. СатыушI организациеу хэлэжьагъэхэмкIэ Iахьзэхэлъ обществэу «Газпром газораспределение Майкоп» зыфиIорэм апэрэ чIыпIэр ыубытыгъ. МысатыушI организациехэм IофшIэным икъэухъумэн анахь дэгъоу зэхищэу къахахыгъэр къэралыгъо ыкIи муниципальнэ фэIо-фашIэхэр зыгъэцэкIэхэрэ Гупчэр ары.Джащ фэдэу АР-м ипрофсоюзхэм я Федерацие гъэсакIохэм ясистемэ изегъэушъомбгъун зиIахь нахьыбэу хэзылъхьагъэхэр рэзэныгъэ тхылъхэмкIэ къыхигъэщыгъэх. Ахэм ащыщых къалэу Мыекъуапэ иеджапIэу N 17-м имузыкальнэ пащэу Дэрбэ Ольгэ, Кощхьэблэ районым ит псэупIэу Натырбыем культурэм и Унэу дэтым икъутамэ ипащэу Олейникова Зинаидэ, жъэгъэузым зыщяIазэхэрэ Адыгэ республикэ сымэджэщым иIофышIэу Ольга Пляснинар, нэмыкIхэр.АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч унагъо зиIэу IофшIэпIэ чIыпIэхэм аIутхэм IэпыIэгъу ятыгъэным ылъэныкъокIэ социальнэ ыкIи IофшIэн зэфыщытыкIэхэмкIэ УФ-м илъэныкъуищ Комиссие игъоу ылъэгъухэрэм ягъэцэкIэн фэгъэхьыгъэ доклад къышIыгъ. Анахьэу кIэлэцIыкIу зэрыс унагъохэм, сабыибэ зыпIухэрэм афэгъэзэгъэ IэпыIэгъоу республикэм щыпхыращыхэрэр къыхигъэщыгъэх.Ащ къызэриIуагъэмкIэ, мы Iофтхьабзэхэм апэIухьанэу 2026-рэ илъэсым пстэумкIи сомэ миллион 254-рэ агъэнэфэгъагъ. Ащ щыщэу сомэ миллиони 190-м ехъур федеральнэ бюджетым къыхэхыгъ, миллион 60-р республикэ ахъщ. Агъэнэфагъэм ипроцент 70-рэ фэдизыр зищыкIагъэм пэIугъэхьагъэ хъугъэ. Сабый зэрыс унагъохэм IэпыIэгъу ятыгъэным фытегъэпсыхьэгъэ Iофтхьабзэхэм япхырыщын тапэкIи зэрэлъагъэкIотэщтым министрэм къыкIигъэтхъыгъ.ХЪУТ Нэфсэт.