Анцокъо И.
КъокIыпIэ лъэпкъхэм яискусствэкIэ Къэралыгъо музеим и Къутамэу Мыекъуапэ щыIэм «Черкес пшъашъ. ЧIыналъэр ыкIи шэн-хабзэхэр» зышъхьэ къэгъэлъэгъон щэкIо. Лъэпкъ шъуашэм и Мафэ ехъулIэу ар къызэIуахыгъ.
Ежь музеим, АР-м и Сурэт къэгъэлъэгъуапIэ, IэпэIасэхэм я Ассоциацие ыкIи унэе хъарзынэщхэм къахэхыгъэ пкъыгъуишъэм нахьыбэ ащ хэхьагъ. IофшIэгъэ зэхэубытагъэхэм яамалкIэ адыгэ бзылъфыгъэм ихудожественнэ дунэееплъыкIэ къэгъэлъэгъоным къыреIотыкIы. Ащ хэлажьэхэрэм ащыщых лъэпкъ шъуашэхэр, гъэдэхэлъэ зэфэшъхьафхэр, дышъэидэкIэ шIыгъэхэр, адыгэ унэм ихьакъу-шыкъухэр, тарихъ сурэтхэр, сурэтышI зэфэшъхьафхэм яIофшIагъэхэу адыгэ бзылъфыгъэм фэгъэхьыгъэхэр. Къэгъэлъэгъоныр къэзыгъэбаирэмэ ащыщ дышъэидэнымкIэ ыкIи пIоблэ шIынымкIэ егъэджэнхэр къызэрэдыхэлъытагъэхэр. Ащ игъэхьазырын дэлэжьагъэр дышъэидэнымкIэ IэпэIасэу, Урысыем илъэпкъ IэпэIасэу, КъокIыпIэ лъэпкъхэм яискусствэкIэ Къэралыгъо музеим и Къутамэу Адыгеим щыIэм ишIэныгъэ IофышIэу Сет Сафыет.— Шэн-хабзэр — псэ зыпыт чIыналъэу адыгэ бзылъфыгъэм мафэ къэс ыгъэпсырэр ары. А IофшIэныр культурэм ылъапсэ зэрэхъурэр тикъэгъэлъэгъон нэрылъэгъу къешIы, — къыщиIуагъ IэпэIасэм къэгъэлъэгъоным икъызэIухын фэгъэхьыгъэ Iофтхьабзэм.Джащ фэдэу къэгъэлъэгъоным икъызэIухын фэгъэхьыгъэ мэфэкI зэхахьэм хэлэжьагъэх КъокIыпIэ лъэпкъхэм ямузей и Кутамэ ипащэу ШъэуапцIэкъо Аминэт, АР-м и Сурэт къэгъэлъэгъуапIэ ипащэу Кушъу Светланэ ыкIи Адыгэ Хасэм ихэсашъхьэ хэт МэщфэшIу Нэдждэт.
— Адыгэ шъуашэм и Мафэ тиIэ хъуныр зигукъэкIыр Адыгэ Хасэр ары. Анахьэу тызымыгъэгупсэфыщтыгъэр ЕмтIылъ Нурбый. Тигухэлъ республикэм къыдыригъэштагъ, нэужым мэфэкIым къэралыгъо статус иIэ хъугъэ. Ар лъэшэу тигуапэ, — къыIуагъ МэщфэшIу Нэдждэт.Адыгэ культурэм, тарихъым, щыIэкIэ-псэукIэм, шэн-хабзэхэм ягугъу зыщытшIыщт мэфэкIыкIэ мы илъэсым къыщегъэжьагъэу зэрэтиIэщтыр Iофтхьабзэм къыщиIуагъ АР-м и Сурэт къэгъэлъэгъуапIэ ипащэу Кушъу Светланэ. Джы илъэс къэс шэкIогъум и 1-р адыгэ орэдыжъым и Мафэу тимэфэпчъ хэтыщт.— ЗэкIэми шъукъесэгъэблагъэ! Апэрэ хэгъэунэфыкIыгъор АР-м и Сурэт къэгъэлъэгъуапIэ щыкIощт. Джащ фэдэу зэхэт къэгъэлъэгъонэу КъокIыпIэ лъэпкъхэм ямузей и къутамэ къыщызэIутхыгъэ къэгъэлъэгъонми цIыфыбэ къэкIонэу сыфай, сыда пIомэ ахэм гухахъо ахэбгъотэнэу щыт ыкIи умышIэрабэ къыпфызэIуахы, — къыIуагъ ащ.«Черкес пшъашъ. ЧIыналъэр ыкIи шэн-хабзэхэр» зыфиIорэ къэгъэлъэгъоныр КъокIыпIэ лъэпкъхэм яискусствэкIэ Къэралыгъо музеим и Къутамэ чъэпыогъум и 8-м нэс щыкIощт.Анцокъо Ирин.