Заомрэ IофшIэнымрэ яветеранхэу, Адыгеим инахьыжъхэу лъытэныгъэ зыфэсшIыхэрэр!СичIыпIэгъу лъапIэхэр!
Зыныбжь хэкIотагъэхэм я Дунэе мафэкIэ сышъуфэгушIо!Илъэсыбэрэ гуетыныгъэ фыряIэу Iоф зэрашIагъэм, акъыл чан, щыIэныгъэм къыхахыгъэ опытышхо зэряIэм афэшI тинахьыжъхэм лъэшэу сызэрафэразэр къэсIонэу непэ амалышIу сиI. Тиобществэ игъэпсын зищыIэныгъэ фэзыгъэIорышIэгъэ тинахьыжъхэм лIэужыкIэхэм щыIэкIэ-псэукIэ дэгъу яIэнымкIэ лъэпсэ пытэ агъэтIылъыгъ, уиIоф узэрэфэшъыпкъэн, узэрэпытэн фаемкIэ ахэр щысэтехыпIэу щытых.Чанэу щыIэныгъэм зэрэхэлажьэхэрэмкIэ тинахьыжъхэм тарэгушхо. Я Хэгъэгу шIулъэгъоу ахэм фыряIэр тыди щызэхэошIэ: тичIыпIэ гупсэ илIыхъужъхэм афэгъэхьыгъэ тарихъ шIэжьым икъэухъумэнкIи, ящагу нахь зэтегъэпсыхьагъэ хъуным зэригъэгумэкIыхэрэмкIи, ныбжьыкIэхэмкIэ гъуазэу зэрэщытхэмкIи. Тинахьыжъхэм гъэхъагъэу ашIыгъэхэм — экономическэ, промышленнэ, культурэ кIэнэу къытфагъэнагъэм лъэшэу тарэгушхо.Тиветеран лъапIэхэр, цIыфыгъэшхо зэрэшъухэлъым, гулъытэ ин зэрэшъуиIэм, неущырэ мафэм игъэпсын тызэрэтежъугъэгушхорэм афэшI «тхьашъуегъэпсэушхо» къышъосэIо.Псауныгъэ пытэ шъуиIэнэу, шъуигъашIэ кIыхьэ хъунэу, жъышъхьэ мафэ шъухъунэу, шъуигупсэхэмрэ шъуиIахьылхэмрэ яфэбэныгъэ шъущымыкIэнэу, шIоу щыIэр зэкIэ къыжъудэхъунэу сыгу къыздеIэу сышъуфэлъаIо!Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и CекретарэуКъумпIыл Мурат.