Мыекъуапэ джыри зэ къыгъэшъыпкъэжьыгъ спортыр ныбджэгъуныгъэм ылъапсэу зэрэщытыр. БлэкIыгъэ зыгъэпсэфыгъо мафэхэм зэхащэгъэ урысые Iофтхьабзэу «Кросс нации» зыфиIорэм республикэм икъэлэ шъхьаIэ хэлэжьагъ.
Урысыем щыпсэурэ лъэпкъхэм языкIыныгъэ и Илъэс къыдыхэлъытэгъэ Iофтхьабзэр республикэ стадионэу «Зэкъошныгъэм» щыкIуагъ. Чъэныр зыгу рихьырэ ыкIи зипсауныгъэ зыгъэпытэ зышIоигъо нэбгырэ 500 ащ хэлэжьагъ. Адыгеим атлетикэ псынкIэмкIэ ифедерациерэ АР-м физическэ культурэмкIэ ыкIи спортымкIэ и Комитетрэ кIэщакIо ащ фэхъугъэх.
ЗэхэщакIохэм зызыушэты зышIоигъохэм апае гъогуонитIу къыхахыгъ — метрэ 1000 ыкIи 2000. Зыныбжь илъэс 13-м шIомыкIыгъэхэм зы километрэ къачъыгъ, нахьыжъхэм километритIу.НахьыкIэхэм якуп (илъэси 9-м нэс зыныбжьхэм) пэрытныгъэр щаубытыгъ Назир Козловымрэ Ульяна Шепелевамрэ. Зыныбжь илъэс 13-м емыхъугъэхэм якуп текIоныгъэр къыщыдахыгъ Ярослав Крючковымрэ Екатерина Головиновамрэ. Метрэ 2000 къэзычъыгъэхэм (илъэс 14-м нэс) анахь щылъэшыгъэх Максим Симоновымрэ Ада Хохловамрэ. 2001 – 2006-рэ илъэсхэм къэхъугъэхэм язэнэкъокъу апэрэ чIыпIэр щаубытыгъ Артем Гессрэ Алина Щуровамрэ. 2010-рэ илъэсым къэхъугъэхэм ыкIи ахэм аныхьыжъхэм якуп пэрытныгъэр щаубытыгъ Артур Раджабовымрэ Марина Погореловамрэ.Зызыушэтыгъэхэм ащыщхэм къызэраIуагъэмкIэ, пкIуачIэ ууплъэкIунымкIэ ыкIи ныбджэгъуныгъэр бгъэпытэнымкIэ Iофтхьабзэр амалышIугъ.